Túrkistandyqtar aýyz sýmen tolyq qamtamasyz etiletin bolady
TÚRKІSTAN. QazAqparat – Túrkistan oblysynyń ákimi Ómirzaq Shókeev oblys ortalyǵyn ortalyqtandyrylǵan aýyz sý júıesimen qamtamasyz etý jumysyn tekserdi, dep habarlaıdy QazAqparat tilshisi.
172 myńǵa tarta halyq turatyn Túrkistan qalasynda ortalyqtandyrylǵan aýyz sý júıesimen qamtamasyz etý jumysy 98,9%-ǵa oryndalǵan. Tirshilik nári Biresek-Hantaǵy jáne Myrǵalymsaı sý kózderinen magıstraldy sý qubyry arqyly tasymaldanady. Qalada qurylysy jańadan salynyp jatqan ákimshilik-iskerlik jáne mádenı-rýhanı ortalyǵyndaǵy nysandardy úzdiksiz sapaly aýyz sýmen qamtamasyz etý úshin, Túrkistan oblysy ákimdigi men tıisti mınıstrliktermen birlese jol kartasy ázirlendi.
Joba boıynsha qashyqtyǵy 45,9 shaqyrym magıstraldy sýaqqynyń qurylysyn salý josparlanǵan. Qazirgi tańda, merdiger mekeme tarapynan 15,1 shaqyrym sýaqqynyń qurylysy aıaqtaldy. Sondaı-aq, Kentaý qalasynan Túrkistan qalasynyń rezervýaryna deıin magıstraldyq sýtartqysh salý jobasy iske asyrylyp jatyr.
Oblys bıýdjetinen júzege asqan joba boıynsha syıymdylyǵy 2h10 000 tekshe metr toptamasy men Oranǵaı, Biresek, Myrǵalymsaı syrtqy sý júıeleriniń qurylysy, 5 sý uńǵymasyn qazý josparlanǵan. Jumys kestege sáıkes júrgizilip keledi.
