Túrkistandyq jýrnalıster sý tasqynynan zardap shekkenderge qoldaý kórsetti
MAQTAARAL. QazAqparat – Sý tasqynyasqyn sýdan zardap shekken maqtaaraldyq jurtshylyqqa kómek berýden Túrkistan oblysynyń jýrnalıster qaýymy da shet qalǵan joq. QR Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı bastaǵan bir top qalamger baspanasyz qalǵan turǵyndarǵa qoldan kelgen kómegin kórsetip, demeýshilik tanytty, dep habarlaıdy QazAqparat tilshisi.
BAQ ókilderi sý basqan Jańaturmys aýylynyń turǵyndarymen kezdesip, olardyń qazirgi tynys-tirshiligimen tanysty. Tasqynnan zardap shekken 207 adam Іzgilik aýylyndaǵy orta mektepke ornalastyrylǵan. Olarǵa Saryaǵash aýdanynyń mamandary qyzmet kórsetip, bar jaǵdaıdy jasaýda. Atalǵan ortalyqtaǵylar jatyn oryn, úsh mezgil ystyq tamaqpen qatar kıim-keshekpen qamtylǵan. Ákimdik qyzmetkerleri tipti qujattaryn da túgendep, joǵaltyp alǵandaryn qaıta rásimdep jatyr. Mundaı qamqorlyqqa shalǵaı aýyldyń túrǵyndary dán rıza.
«Topan sý kelgende ústimizdegi kıimmen shyǵyp kete saldyq. Sodan qyrda eki kún jatyp, artynsha osynda jaıǵastyq. Qazir shúkirlik aıtamyz, osynda kúndelikti elimizdiń túkpir-túkpirinen azamattar kelip, qoldan kelgen kómegin berip jatyr. Alla razy bolsyn. Bizdiń jaǵdaıymyzdy surap, jyly sózderin aıtýda. Osyndaı qıyn qystaý kezde jyly sóz bizge zor demeý», - deıdi Bazarkúl Esjanova.
Munan soń tilshiler toby Atakent kentindegi Q.Sátbaev atyndaǵy orta mektepke baryp, ondaǵy oqýshylarǵa sý jańa teledıdardy tartý etti. Qazirgideı qıyn sátte qashyqtan bilim alyp, evakýatsııalyq ortalyqty panalaǵan balalar qýanyshqa bólendi. Sondaı-aq, oblystyq shtab qoımasynyń jumysymen tanysyp, tolassyz kelip jatqan gýmanıtarlyq júk kerýeniniń jetekshilerimen tildesti.
Túrkistan oblystyq «Jastar resýrstyq ortalyǵy» KMM eriktiler klýbynyń jumysy da jýrnalıster nazarynan tys qalǵan joq. Shtab jınalysyna qatysqan Túrkistan oblystyq Jýrnalıster odaǵynyń tóraǵasy Ǵalymjan Elshibaı erikti jastardyń qaıyrymdy isine alǵysyn jetkizdi. Baspanasy sý astynda qalǵan áriptes, Maqtaaral aýdany ákiminiń baspasóz hatshysy Dinmuhamed Aıazbekovke odaq músheleri atynan qarjylaı kómek kórsetti. Jýrnalıster men eriktiler, blogerler qatysqan kezdesýde aqparat keńistiginde obektıvti kózqaraspen shynaıy aqparat taratýdyń mańyzy aıtyldy.
«Eger aqparat durys taralsa, eldiń baǵyt-baǵdary da durys damıdy. Bir ǵana aqparatpen eldi dúrliktirýge de, sabyrǵa shaqyryp, basý aıtýǵa da bolady. Sol sebepti dál qazirgideı qıyn qystaý kezeńde jýrnalısterdiń aýyzbirshiligi myqty bolýy kerek. Halyq patsha kóńiline qaraı maqtaaraldyqtarǵa kómek berýde. Biz de qoldan kelgenimizshe qol ushyn sozyp jatyrmyz»,-dedi Ǵalymjan Elshibaı.
Bir top jýrnalıster sondaı-aq 9 mamyr - Jeńis kúnine oraı Myrzakent kentinde turatyn soǵys ardageri Seıitmurat Quzjanovtyń úıinde boldy. Tilshiler qarııany Jeńis kúnimen quttyqtap, syılyq tabystady. Ardagerdiń jasy toqsan beste. Bes ul-qyz ósirip, 20 nemere, 19 shóbere jáne 2 shópshek súıip otyr. Áli de shıraq ári sergek. Gazet oqyp, teledıdardan jańalyq kórýden jańylmaıdy. 18 jasynda maıdanǵa attanǵan jaýynger surapyl soǵys jyldaryn umytqan emes. Jeńistiń qaısarlyqpen kelgenin aıtady. Soǵys ardageri «Germanııany jeńgeni úshin» medalimen jáne «1-2 dárejeli Otan soǵysynyń» ordenderi sekildi 17 tósbelgimen marapattalǵan. Qarııa búgingi urpaqtyń osynaý syı-qurmetine rızashylyǵyn bildirip, jýrnalısterge aq batasyn berdi.
Sapar sońynda qalam ustaǵan qaýym Maqtaaral aýdanynyń ákimi Baqyt Asanovtyń qabyldaýynda bolyp, tasqyn sý zardabyn joıý men turǵyn úı qurylys jumystaryn júrgizý, shyǵyn tólemderiniń qalaı júzege asatyny týraly surap bildi.
Óz kezeginde sóz alǵan aýdan basshysy qıyn-qystaý kezeńde maqtaaraldyqtarǵa qol ushyn sozǵan BAQ ókilderine alǵys aıtty.
