Túrkistandyq jýrnalıster SQO-ǵa qonys aýdarǵandardyń turmysymen tanysty
M.JUMABAEV AÝDANY. QazAqparat - Túrkistandyq BAQ ókilderi baspasóz konferentsııasynan soń birden Soltústik Qazaqstan oblysynyń Maǵjan Jumabaev aýdanyndaǵy Oktıabrskoe aýylyna at basyn tiredi, dep habarlaıdy QazAqparat Túrkistan oblysy óńirlik kommýnıkatsııa qyzmetine silteme jasap.
Bul aýylda orta mektepte «Alǵashqy áskerı daıyndyq» páninen sabaq beretin Maqsat Esjanov atty azamat turady. Ol muǵalimdikpen qatar, shaǵyn sharýa qojalyǵyn ustaıdy. Qazirgi tańda 10 sıyr baǵatyn Maqsat «Igilik» ÁKK-ge sút ótkizip otyr.
M.Jumabaev aýdanynyń sulý tabıǵaty aýyl sharýashylyǵyna óte qolaıly bolǵandyqtan, bul óńirge ońtústikten kóship keletin kópshilik mal ustap, eginmen aınalysqandy jón kóredi.
Túrkistan oblystyq Qoǵamdyq damý basqarmasynyń uıymdastyrýymen ótip jatqan aqparattyq týr aıasynda «Sýlyshoqy» aýylyna kelgen jýrnalıster qaýymy «Jánibek» sharýa qojalyǵynyń jumysymen tanysty. Ońtústiktegi halqy tyǵyz qonystanǵan óńirden soltústikke kóptep tartý maqsatynda «Jánibek» sharýa qojalyǵynyń basshysy Qaırat Jánibekov 4 baspana salýda. Kelesi jyly taǵy da 5 úı salý josparda bar. Qazir bul aýylda aýyl sharýashylyǵymen aınalysatyn 4 januıa jańadan salynyp jatqan úılerge kóship barýǵa daıyn.
Petropavl qalasynda jańadan ashylǵan «Qytaı emdeý ortalyǵynyń» ıesi Móldir Іztileýovanyń joldasy - dáriger. Bul otbasy SQO-ǵa 2016 jyly Ordabasy aýdany, Shubarsý eldimekeninen kóship kelgen. Erli-zaıyptylar Qyzyljar qalasynan Qytaı emdeý ortalyǵyn ashty.
Qazirgi kezde Soltústik Qazaqstan oblysynda 1 myńnan astam bos jumys orny bar. Qonys aýdarýǵa nıet bildirgen azamattarmen konsýltatsııa júrgizý kezinde birinshi kezekte, mamandyǵy boıynsha bos oryndar nemese balama túri usynylady. Sonymen qatar qonys aýdarýshylar ózderi jumysqa ornalasa alady.
Eske sala ketsek, Túrkistan oblysynyń bir top jýrnalısi men belsendileri «Túrkistan – Qyzyljar – Qostanaı – Kókshetaý» aqparattyq týry aıasynda soltústik óńirde saparmen júr.
