Túrkistandyq jolaýshy kólikte qoldan jasalǵan qosaýyz myltyq alyp júrgen
Tártip saqshylary qaýipsizdik belbeýin taqpaǵan júrgizýshini baıqap, «Skoda Superb» markaly kólikti toqtatqan.
Qujattaryn tekserý barysynda kóliktiń ishinen qarýdy baıqapty. Sodan oqıǵa ornyna birden jedel-tergeý toby shaqyrtylǵan.
«Júrgizýshiden jaýap alý barysynda qarý qasyndaǵy jolaýshyǵa tıesili ekeni anyqtaldy. Al, kúdikti qarýdy taýyp alǵanyn jetkizdi. Kýálardyń qatysýymen tárkilengen qarý, qosaýyzdy 16 kalıbrli qoldan jasalyp, nómiri óshirilgen sholaq myltyq bolyp shyqty. Aıǵaq retinde alynǵan qarýǵa sot-ballıstıkalyq saraptama taǵaıyndaldy»,-delingen Túrkistan oblysy polıtsııa departamentiniń baspasóz qyzmeti taratqan habarlamada.
Atalǵan jaıt QR QK 287-baby boıynsha tirkelgen. Búgingi tańda kúdiktige qatysty sotqa deıingi tergeý amaldary júrip jatyr.
