Túrkistandyq jıhaz fabrıkasy «Altyn sapa» syılyǵyn ıelendi

TÚRKІSTAN. QazAqparat – Túrkistandyq «Grand Miks» jıhaz fabrıkasy «Halyqqa arnalǵan taýar shyǵaratyn úzdik kásiporyn» nomınatsııasy boıynsha «Altyn sapa» syılyǵyn ıelendi, dep habarlaıdy QazAqparat tilshisi.

Atalǵan marapat Nur-Sultan qalasynda ótken QR Prezıdentiniń «Altyn sapa» syılyǵyn tapsyrý sharasy kezinde berildi.

Elimizdegi úzdik kásiporyn atanǵan jıhaz fabrıkasy jumysyn osydan 20 jyl buryn 4 adammen bastaǵan. Ol kezde kishigirim tseh retinde ashylyp, keıinnen memlekettik qoldaýdyń kómegimen kompanııa óndirilgen ónim túrin arttyrǵan. Búgingi kúni zaýyt elimizdegi iri óndirýshi, al «Grand Miks» ataýy halyqaralyq trendterdi qoldaıtyn jıhaz óndirisi salasynda brendke aınalyp otyr.

Aıta keteıik, QR Prezıdentiniń «Altyn sapa» syılyǵy kásipkerlerge jyl saıyn ónimniń sapasy men onyń qaýipsizdigin qamtamasyz etý salasynda aıtarlyqtaı nátıjelerge qol jetkizgeni úshin beriledi. Sondaı-aq, sapany basqarýdyń tıimdiligi joǵary ádisterin engizgeni úshin tapsyrylady.

Bul joly bıznes ozattaryn marapattaý sharasyna QR Premer-Mınıstri Asqar Mamın men «Atameken» QR UKP Tóralqa tóraǵasy Tımýr Qulybaev, palatanyń Basqarma tóraǵasy Abylaı Myrzahmetov pen Túrkistan oblysynyń ákimi Ómirzaq Shókeev jáne kásipkerler palatasynyń basshylyǵy onlaın qosyldy.