Túrkistandyq jas memlekettik baǵdarlamalardyń arqasynda kásibin dóńgeletip otyr

BÁIDІBEK. QazAqparat – Túrkistan oblysyna qarasty Báıdibek aýdanynda jas jigit «Bıznestiń jol kartasy-2020» baǵdarlamasynyń arqasynda kásibin dóńgeletip otyr. Ulan Aıtymbetov memleket tarapynan jeńildetilgen paıyzben ári kepilsiz beriletin qarajatqa maı aýystyrý men avtokólik dóńgelegin jelimdeý beketin ashqan, dep habarlaıdy QazAqparat tilshisi.

Báıdibek aýdanynda kásip ashyp, nesibemdi tabamyn degen jastarǵa oqý-tájirıbelik te, qarjylaı da kómek kórsetilýde. Ulan Aıtymbetov memlekettiń osyndaı jeńildigin paıdalanyp, búginde óz kásibin júrgizip otyr. Ol joǵary oqý ornynda syrttaı oqı júrip, maı aýystyrý beketteriniń birinde jumys isteıdi. Sóıtip bolashaq kásibine degen qyzyǵýshylyǵy oıanyp, jospar qurǵan. Dıplomy qolǵa tıgen soń, Shaıan aýylynda «Bıznestiń jol kartasy-2020» baǵdarlamasyna qatysqan. 2012 jyly maı aýystyrý men avtokólik beketin ashyp, kásibin bastaǵan.

«Eki jyldaı ýaqyt ótken soń, aýdan ortalyǵynda «Kásipkerlik mektebi» ashyldy. Oblys ortalyǵynan arnaıy mamandar kelip, dáris júrgize bastady. Men de sol mektepten kásipkerliktiń qyr-syryn meńgerip, qolyma sertıfıkat aldym. Kelesi josparym - kásibimniń aıasyn keńeıtý maqsatynda qarjy kólemin arttyrý edi. Sonymen «Aýyl sharýashylyǵyn qoldaý qory» bankinen tómengi paıyzdy nesıe alyp, qajetti tehnıkalarǵa qol jetkizdim. Birneshe jasty jumyspen qamtydym. Maı aýystyrý men avtokólik dóńgelegin jelimdeý beketin retke keltirip, zamanaýı qurylǵylar satyp aldym», - deıdi jas kásipker. Osy jyldyń maýsym aıynda Ulan Aıtymbetov «Yrys» MQU» JShS arqyly jeńildetilgen paıyzben, kepilsiz berilip otyrǵan 2 mln teńgeniń sertıfıkatyna ıe bolǵan. Jas kásipker bul aqshaǵa da kólik qyzmetterin odan ári aýqymdy túrde keńeıtip, eldiń ıgiligi jolynda jumys istemek. Osylaısha eńbektiń kózin taýyp, búginde kópshiliktiń yqylasyna bólenip júr.