Túrkistandyq úzdik jas túlekter marapattaldy
TÚRKІSTAN. QazAqparat - Búgin Túrkistan oblysy ákiminiń orynbasary Málik Otarbev halyqaralyq, respýblıkalyq ǵylymı joba jarystary men pán olımpıadalarynda jáne óner, sport jarystarynda úzdik kórsetkishter kórsetken óńirdegi úzdik 40 oqýshymen kezdesti, dep habarlaıdy QazAqparat.
Basqosý barysynda oblys ákiminiń orynbasary jas túlekterdi quttyqtap, oblys mereıin asyrǵan talapty túlekterge jáne onyń bilikti ustazdaryna alǵysyn jetkizdi.
«Úlken ómirge basqan qadamdaryńyz qutty bolsyn! Aldaǵy emtıhannan sátti ótip, tańdaǵan mamandyqtaryńyz boıynsha joǵary oqý oryndaryna túsýlerińizge tilektespin. Jastar, sizderdiń alar asýlaryńyz, shyǵar bıikterińiz áli alda! Sizderdi osyndaı dárejege jetkizgen ata-analaryńyzǵa, ustazdaryńyzǵa úlken alǵysymdy aıtamyn», - dedi Málik Otarbev.
Óz kezeginde, túlekter óz jetistikteri, aldaǵy josparlary týraly aıtty. Sonymen qatar, úzdik jas túlekter dıplomdar men baǵaly syılyqtarmen marapattaldy.
Aıta keteıik, 2018-2019 oqý jylynda túrkistandyq oqýshylar dúbirli dodalardan 14 altyn, 25 kúmis, 42 qola medal oljalaǵan.
Almaty qalasynda ótken respýblıkalyq ǵylymı jobalar baıqaýynyń qorytyndysy boıynsha Túrkistan oblysynyń quramasy eń úzdik komandalardyń biri bolyp tanyldy.
