Túrkistandyq ustaz erekshe balalar armanynyń oryndalýyna atsalysýda
Túrkistan qalasynyń turǵyny Ásel Bımyrzaeva «Meniń armanym» atty jobany júzege asyryp keledi. Qaladaǵy mektepte muǵalim bolyp qyzmet atqaratyn ol ár aıda úıde oqıtyn múgedektigi bar 10 balanyń armanyn oryndap, qýanyshqa keneltip otyr. Maýsym aıynan besinshi ret uıymdastyrylǵan ıgi is barysynda Ásel Mahanbetqyzy qaladaǵy 70-ten astam balanyń kishigirim armanyn oryndady.
«Meniń ulym da 4-synypqa deıin úıde oqydy. Qazir emdetip, jaǵdaıyn túzep aldyq. Sondaı-aq ózim ustaz bolǵandyqtan úıde oqıtyn balalarǵa sabaq beremin. Arasynda ártúrli balalar bar. Bireýi júre almaıdy, biri sóıleı almaıdy. Tipti tósekten tura almaıtyndar da bar. Jaǵdaılaryn kórip janym ashıdy, jylaǵym keledi. Sabaqtan tys ýaqytta qastarynda qalyp, kóp sóılesemin. Olarmen syrlasyp, arman maqsattaryn tyńdaımyn. Sodan taǵdyrdyń synaǵyna túsken balalardyń az da bolsa kóńilin kóterip, qýantqym keldi» - deıdi joba jetekshisi.
Ásel Bımyrzaeva Túrkistan qalasyndaǵy Ata-túrik atyndaǵy №17 mektepte orys tili páninen sabaq beredi. Bos ýaqytynda qoǵamdyq istermen aınalysady. Ózi qolǵa alǵan jobasy aıasyndaǵy jumystardy úılestirip otyrady.
«Eń aldymen, balalarǵa armanyn jazdyramyn. Qoly ıkemge kelmeıtinderine ata-anasy kómektesedi. Bala armany jazylǵan qaǵazdy konvertke salyp, demeýshilerge tapsyramyn. Sodan bir kúndi belgilep, syılyqty tapsyramyz», - deıdi ol.
Jalpy Túrkistan qalasynda 1000 astam erekshe bala bar. Joba jetekshisiniń aıtýynsha, olardyń armanyn oryndaýda túrli sala basshylary men kásipkerler, qoǵam belsendileri men úkimettik emes uıym ókilderi, ujymdar jaqsylyq jasaýda jarysyp jatqan jaıy bar.
Máselen, Túrkistan oblysy Polıtsııa departamentiniń bastyǵy Murat Qabdenov Azamat esimdi balaǵa elektrli samokat syılasa, «AMANAT» partııasy Túrkistan oblystyq fılıalynyń atqarýshy hatshysy Beısen Tájibaev Іnjý esimdi qyzdyń armanyn oryndap, Hanshaıym kóılegin alyp bergen. Al aqyn Qalqaman Sarın Ábdimálik esimdi jetkinshektiń unatqan kıimin tartý etse, arystyq azamat Amantaı Baıtanaev Jaırona esimdi qyzǵa velosıped syılapty.
