Túrkistandyq turǵyndardyń erkin júrip-turýyna shekteý qoıyldy
TÚRKІSTAN. QazAqparat – Túrkistan qalasynda sıtýatsııalyq ortalyq ashylyp, turǵyndardyń erkin júrip-turýyna shekteýler qoıyldy. Bul týraly jedel shtab jıyny kezinde qala ákimi Rashıd Aıýpov málimdedi, dep habarlaıdy QazAqparat tilshisi.
Qala basshysynyń aıtýynsha Bas memlekettik sanıtarlyq dáriger qaýlysyna oraı shaharda birqatar shekteý engiziledi.
«Dúısenbi sıtýatsııalyq ortalyq jumysyn bastap, oǵan polıtsııa, tótenshe jaǵdaı, taýarlar men kórsetiletin qyzmetterdiń sapasy men qaýipsizdigin baqylaý, dárigerler jáne ákimdiktiń ár sala mamandary tartylady. Beınekamera ornatylyp, dıspetcherlik baılanys nómir qarastyrylady»,- dedi Rashıd Abatuly.
Shahar basshysynyń tapsyrmasyna sáıkes, endigi jerde qoǵamdyq kóliktiń qozǵalysyna da shekteý qoıylady. Tek tańerteń 7.30-10.00 jáne keshkisin 17.30-20.00 aralyǵynda bir ret qana baǵytqa qatynaıdy. Turǵyndarǵa «Altyn bulaq» kóterme saýda bazarynan dúkenderge jóneltilgen azyq-túlik jetkiziledi. Odan bólek, tapsyrys arqyly qyzmet kórsetýge 22 kólik daıyn. Aldymen, kúrish, makaron, kartop, sábiz, oramjapyraq, pııaz, tuz, kúnbaǵys maıyna tapsyrys qabyldansa, suranys boıynsha tizimi ulǵaıatyn bolady. Sondaı-aq, hımııalyq turmystyq zattar da bar. Jetkizý qyzmetine dárihana, dámhanalar men meıramhanalar da qosylady. Ol úshin árbir turǵyn uıaly telefondaryna «Amazing Turkistan» qosymshasyn júktep alsa, kerekti zattaryna tapsyrys bere alady.
Aıta keteıik, qala ákimdiginiń 6 mobıldi toby men polıtsııa qyzmetkerleri jurtshylyqty qajetsiz syrtqa shyqpaý boıynsha túsindirýdi bastap ketti. Sondaı-aq, blok beketterdegi baqylaý jumysy qatań qadaǵalaýǵa alynǵan.
