Túrkistandyq turǵyn jol ortasynda adamdy pyshaqtap óltirdi
Oqıǵa naýryzdyń 12-sinen 13-ine qaraǵan túni saǵat 23:30 shamasynda bolǵan. Kúdikti Kentaý qalasynyń jergilikti turǵyny jáne buryn sotty bolǵany anyqtaldy. Ol jolaýshy retinde kóliginiń artqy jaǵynda otyrǵan jigitti jol boıyna shyǵaryp alyp, moınynan pyshaq suqqan. Jaraqattanǵan jigit, aýrýhanada kóz jumdy.
Qazirgi tańda kúdikti qamaýda, oǵan qatysty QR QK-niń 99-baby 1-bóligi («Adam óltirý») boıynsha sotqa deıingi tergep-tekserý amaldary júrgizilýde.
Túrkistan oblysy Polıtsııa departamentiniń Instagram-daǵy resmı paraqshasyna Túrkistan qalasynyń turǵyny júginip, Nurlan esimdi polıtsııa qyzmetkeriniń batyrlyq áreketine kýá bolǵanyn, sol úshin oǵan alǵys aıtqysy keletinin jetkizgen.
Anyqtalǵandaı, qala turǵyny túngi ýaqytta Túrkistannan Kentaý qalasyna óz kóligimen ketip bara jatqanda jol boıynda jınalyp turǵan bir top adamdardy kórgen.
«Jol-kólik oqıǵasy boldy ma, adamdar nege jınalyp tur dep men de toqtap, jaqyndadym. Bir jigit joldyń ortasynda ekinshi bir jigittiń moınyna pyshaq suǵyp, ústine otyryp alyp, jibermeı tur eken. Sol jerde turǵan basqa da kýágerlermen birge ekeýin ajyratpaqshy bolyp, jábirlenýshini qutqarǵymyz kelip jaqyndaı bergenimizde, qolyndaǵy pyshaǵyn bizge sermep, «jaqyndasańdar barlyǵyńdy óltiremin» dep mańyna da jolatpady. Qoryqqanymyzdan ne isterimizdi bilmeı qaldyq. Polıtsııa men jedel járdemge habar berdik.
Sol sátte bizdiń janymyzǵa kólik kelip toqtady da, ishinen bir polıtsııa qyzmetkeri atyp shyqty. Júgirip baryp, qylmyskerdiń qolynan shap berip, pyshaǵyn alyp, onyń qarsylasqanyna qaramastan, qolyn qaıyrdy. Osylaısha kóz aldymyzda biz daýalamaı turǵan oqıǵany birden toqtatty. Sálden soń basqa da polıtsııa qyzmetkerleri men jedel járdem keldi. Biz birneshe adamdar sol kezde óz-ózimizge áreń kelip, polıtseıdiń qolyn qysyp, raqmet aıttyq», - dep jazdy oqıǵaǵa kýá bolǵan túrkistandyq.
Onyń aıtýynsha, adamdar batyl polıtseıdiń esimin ǵana surap úlgergen.
«Osy bir oqıǵa kóz aldymda bolǵandyqtan polıtseıdiń jasaǵan is-áreketi úshin ony qalaı da taýyp, rızashylyǵymdy jetkizýim kerek dep oıladym. Osy sátte QR ІІM-ne osyndaı batyr polıtseılerdi jumysqa alyp, tárbıelegenderi úshin alǵys aıtamyn. Nurlan sııaqty polıtseıler kóp bolsyn!», - deıdi qala turǵyny.
Osy hattan keıin Polıtsııa departamentiniń qyzmetkerleri oqıǵa kýágerine paraqshaǵa qaldyrǵan telefon nómiri boıynsha habarlasqan.
Málim bolǵandaı, qylmyskerdi quryqtaǵan polıtseı – Kentaý qalalyq polıtsııa bóliminiń ýchaskelik qyzmetkeri, maıor Nurlan Ábdıev.
N.Ábdıevtiń sózinshe, barlyǵy qas-qaǵym sátte bolǵan.
«Ýchaskelik polıtseı bolǵandyqtan sol kúni túngi shaqyrtýdan shyǵyp, qyzmet babymen áriptesim – ýchaskelik polıtsııa ınspektory, polıtsııa maıory Birjan Ábýbákirmen birge Túrkistan qalasyna ketip bara jatqan edik. Qarasaq, joldyń ortasynda adamdar jınalyp tur, janynda kólik toqtap tur eken. Anyqtap qarasam, belgisiz bir azamat qolynda pyshaǵy bar, ekinshi bir jigittiń ústine shyǵyp alyp, jibermeı tur. Bergi jaǵynda adamdar jaqyndaı almaı úreılenip tur eken. Kólik toqtaı salysymen birden tústim de, qylmyskerdiń sózin tyńdamastan birneshe ádis-tásilimdi qoldanyp, árkez shynyǵyp júrgenniń arqasynda ony quryqtap úlgerdim. Basqa da kýágerlerge zııanyn tıgizbesin dep áriptesterim kelgenshe ustap otyrdym. Kúdiktiniń qolyna kisen salyp, polıtsııa bólimine jetkizdik. Sol sátte kýágerler kelip qolymdy qysyp, alǵys aıtty. Biraq men bul áreketimdi batyrlyq dep eseptemeımin, men tek óz qyzmetimdi atqardym. Bizdi qyzmetke alǵash qabyldaǵanda «Sender jumysta bolsańdar da, bolmasańdar da, qylmys oryn alsa, sol sátte tıisti áreketti jasap, oqıǵanyń órshimeýine yqpal etýleriń kerek. Óıtkeni sender polıtseısińder» dep úıretken. Sondyqtan men óz mindetimdi atqardym», - deıdi polıtsııa qyzmetkeri.