Túrkistandyq túlekter kópbalaly otbasyǵa úı alyp berdi

TÚLKІBAS. QazAqparat –Túlkibas aýdanynyń 20 jyl burynǵy túlekteri kópbalaly otbasyǵa 4 bólmeli baspana syılady. Bul týraly QazAqparat ákimdikke silteme jasap habarlaıdy.

Mektep túlekteri úıdi kópbalaly Dúısenbekovter otbasyna tabystady. Otaǵasynyń múgedektigi bar otbasy 13 jyl jaldamaly páterde turyp kelgen. Mektep qabyrǵasyndaǵy ótken «Sońǵy qońyraý» sharasynan keıin túlekter tosyn syı jasap, kiltti otbasyǵa tabystady.

Baspana zaman talabyna saı jóndeýden ótken. Elektr jaryǵy men sý jáne gazyn da qosyp, ishin qajetti jıhazben de qamtyǵan. Osy ýaqytqa deıin aýdan ákimdiginiń qamqorlyǵynda bolyp kelgen otbasyǵa aldaǵy ýaqytta jomart jandar men memleket tarapynan basqa da kómekter kórsetilmek.

Budan ózge, aýdandaǵy Qaraǵashty aýylynda Daýan jalpy orta mektebiniń dál osyndaı 20 jyl buryn bitirgen túlekteri tórt birdeı múmkindigi shekteýli jandary bar Tájibaevtar otbasynyń qulap qalǵan úıin qaıta turǵyzyp, baspanasyn jańartyp bergen. Sondaı-aq, atalǵan mekteptiń túlekteri Qaraǵashty aýylynyń ortalyq meshitiniń jylý júıesin júrgizip, kilemderin jańartyp bergen.