Túrkistandyq túlekter 20 jyldyq keshten bas tartyp, aýyldastarynyń úıin jóndep berdi

TÚRKІSTAN. QazAqparat – Túrkistandyq túlekter tótenshe jaǵdaı kezinde qaıyrymdy is jasap, aýyldastaryn qýantty. Shardara aýdanyna qarasty Qyzylqum aýyldyq okrýgindegi túlekter 20 jyldyq keshten bas tartyp, aýyldastarynyń úıin jóndep berdi, dep habarlaıdy QazAqparat tilshisi.

Orta mekteptiń 2000 jyly bitirgen azamattar eldegi tótenshe jaǵdaıdy eskerip, mamyr aıyna josparlaǵan is-sharalardy toqtatyp tastaǵan. Qasıetti Ramazan aıynda ıgi isti qolǵa alǵan tturǵyndar aýyldastarynyń úıiniń esik-terezesin jańartyp, aýlasynan qudyq qazdyryp bergen. Sebebi bul otbasy otaǵasynan aırylyp, asyraýshysyz qalǵan. Múgedek balasymen birge turatyn zaǵıp ana aýyldastarynyń qaıyrymdy isine alǵys aıtyp, batasyn berdi.

«Elimizde oryn alǵan tótenshe jaǵdaıǵa baılanysty biz synyptastarymyzben aqyldasa kele, biraýyzdan osyndaı sheshimge keldik. Mamyr aıynda josparlap qoıǵan 20 jyldyq keshten bas tarttyq. Oǵan jumsalar qarajatty jınap, jerlesterimizge qol ushyn berýdi jón kórdik. Barsha musylman baýyrlarymyzdy jaqsylyq jasaýǵa shaqyramyn», – dedi túlekterdiń biri Shýkýir Shamshadınov.

Sondaı-aq, Qyzyl qum orta mektebin osydan 20 jyl buryn bitirgen azamattar áleýmettik-turmystyq jaǵdaıy tómen taǵy 15 otbasyna azyq-túlik jıyndyqtaryn taratty. Іzgilikti is jasap, birliktiń úlgisin kórsetken mektep túlekterine jerlesteri dán rıza boldy. Saýapty iske túlekter mıllıon teńgedeı qarajat jumsaǵan.