Túrkistandyq túlekter 20 jyldyq qarsańynda synyptasyna úıdiń kiltin tabystady
Túrkistan oblysynda «Rýhanı jańǵyrý» baǵdarlamasy aıasynda «Altyn uıam» jobasy qolǵa alynǵany belgili. Qaıyrymdylyq jasaýǵa shaqyratyn bastamany qabyl alǵan túlekter oblystyń ár qıyrynda júrekti eljireter ıgi isterimen qýantyp jatyr. Sondaı qýanyshty oqıǵanyń biri Túrkistan qalasynda ótti.
Oblys ortalyǵyndaǵy «Bekzat» shaǵynaýdanynda ornalasqan J.Jabaev atyndaǵy №11, J.Edilbaev atyndaǵy №18 jáne Abaı atyndaǵy №31 mektepterin 1999 jyly bitirgen túlekter ózderiniń 20 jyldyq kezdesýleri qarsańynda izgilikti isti qolǵa aldy.
Ataýly kúndi atap ótý maqsatynda bas qosqan úsh mekteptiń túlekteri Ramazan aıynda qaıyrymdylyq sharany ótkizýdi uıǵaryp, ózderiniń arasynan kómekke muqtaj synyptastaryna turǵyn úı salyp berýdi josparlaǵan. Jýyrda osy izgilikti oı iske asyp, taǵy bir otbasy qýanyshqa keneldi.
«Jaqsylyqty áýeli jaqynyńnan basta» degendeı, qarııa anasymen birge turatyn synyptas jigittiń turmystyq jaǵdaıyn eskergen qurdastary oǵan turǵyn úı tabystaýdy jón kóripti. 1982 jyly týǵan qaıyrymdy azamattar úıdiń qurylysyn aıaqtap 3 bólmeli úıdi Ramazan aıynda ıesine tapsyrdy. Shyn nıetpen qolǵa alynǵan is ońdy bolyp, qýanyshqa kenelgen azamattyń úıinde aýyzashar berildi.
Osylaısha oblys ákimdigi qolǵa alǵan «Altyn uıam» jobasyn izgilikti ispen jalǵaǵan túrkistandyq túlekter bir otbasyny qýanyshqa bóledi. Olımpıada chempıony Bekzat Sattarhanov týyp-ósken aýyldyń azamattaryna el de dán rıza.
