Túrkistandyq sportshylar el chempıonattarynda 232 altyn medal enshilegen
TÚRKІSTAN. QazAqparat – Túrkistan oblysynyń sportshylary jyl basynan beri el chempıonattarynan 232 altyn medal ıelengen. Bul týraly búgin óńirlik kommýnıkatsııalar qyzmetinde ótken brıfıngte oblystyq dene shynyqtyrý jáne sport basqarmasynyń basshysy Polat Qyryqbaev málimdedi, dep habarlaıdy QazAqparat tilshisi.
Basqarma basshysynyń aıtýynsha, oblysta buqaralyq sportty damytý maqsatynda 3600-ge jýyq is-shara ótip, oǵan 436,3 myń adam qatysqan. Sondaı-aq, oblysta ulttyq sport túrlerin nasıhattaý baǵytynda 466 sporttyq shara uıymdastyrylyp, halyqtyń sportpen qamtylýy 30 paıyzdy qurap otyr.
«Qazirgi tańda aýdan, qalalardaǵy halqy 1 myń adamnan asatyn jergilikti okrýg ákimdikterinde dene shynyqtyrý jáne sport salasyna jaýapty nusqaýshy-ádisker shtatyn ashý jumystary júrip jatyr. Bul - buqaralyq sportty damytý qadamdary. Búgingi kúni óńirde 4328 sport nysany tirkelgen. Budan bólek, 9 aı qorytyndysymen oblys aýmaǵynda aýdan, qala ákimdikteri tarapynan 64 sport jáne oıyn alańshasy salynyp, paıdalanýǵa berildi», - dedi Polat Naýryzbaıuly.
Aıta keterligi, 2019 jyldyń 9 aıynda oblys sportshylary sporttyń 52 túri boıynsha QR chempıonattaryna qatysyp, 186 kúmis, 258 qola medal jeńip alǵan. Sonymen qatar, jyl basynan beri ótken Azııa chempıonattary men kýboktarynda oblys sportshylary 53 altyn, 18 kúmis jáne 14 qola medalge qol jetkizse, osy ýaqyt aralyǵynda Álem chempıonattary men kýboktarynda oblys sportshylary 11 altyn, 8 kúmis jáne 11 qola medaldi enshiledi. 2020 jyly Japonııanyń Tokıo qalasynda ótetin kezekti jazǵy Olımpıada oıyndaryna joldama beretin lıtsenzııalyq jarystarǵa oblystan 21 sportshy qatysady.
Qazirgi ýaqytta Túrkistan oblysynyń 2024 jylǵa deıingi áleýmettik-ekonomıkalyq damýyna arnalǵan keshendi josparǵa sáıkes, oblys ortalyǵynda sport túrlerinen respýblıkalyq jáne halyqaralyq jarystardy ótkizýge múmkindik beretin birqatar sport nysandary salynýda. Máselen, 7 myń oryndyq «Ortalyq stadıon» men jabyq basseıni bar sport saraıy 2020 jyldyń maýsym aıynda paıdalanýǵa beriledi. «Olımpıadalyq rezervter daıyndaıtyn sport mektebi» bıyl ashylady.
