Túrkistandyq ShOB ónim kólemi boıynsha kósh bastady
TÚRKІSTAN. QazAqparat – Túrkistan oblysynda shaǵyn jáne orta bıznes sýbektileri 450 mln teńgeniń ónimin óndirgen. Bul ótken jylmen salystyrǵanda 133%-ǵa ósip, respýblıka boıynsha І orynǵa kóterilgen, dep habarlaıdy QazAqparat tilshisi.
Oblys ákiminiń orynbasary Meıirjan Myrzalıevtyń sózinshe, óńirde 141 992 shaǵyn jáne orta bıznes sýbektisi jumys isteıdi. Bul ótken jylmen salystyrǵanda 108,6 paıyzǵa artyq degen sóz.
«Kásipkerler úshin qarjylandyrý qoljetimdiligin arttyrý maqsatynda birqatar memlekettik jáne óńirlik baǵdarlamalar sheńberinde qarjylandyrý kólemi ulǵaıtyldy. Bul úshin 2019 jylǵa 74,6 mlrd. teńge kózdelip, soma ótken jylmen salystyrǵanda 16,5 mlrd. teńgege artty. Bólingen qarajat sheńberinde 5 myńnan astam shaǵyn jáne orta bıznes jobalary jáne 42 myńǵa jýyq aýylsharýashylyǵy taýar óndirýshileri qarjylandyryldy», – dedi oblys ákiminiń orynbasary.
Sonymen qatar, «Qamqor», «Jas kásipker» jáne «Kásipker ana» baǵdarlamalary aıasynda 1 paıyzdyq mólsherlememen kásipkerlerge qarjylaı qoldaý kórsetilgen. Onyń ishinde Arys qalasy boıynsha 320 mln teńgege 86 joba qarjylandyrylyp, halyqtyń ál-aýqatyn kóterý boıynsha jemisti jumystar atqarylǵan.
