Túrkistandyq sheneýnikter túrmedegi tártippen tanysty

TÚRKІSTAN. QazAqparat – Túrkistandyq sheneýnikter temir tordyń arǵy jaǵyndaǵy tártippen tanysty. Sharany QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti men Qylmystyq atqarý júıesi Komıtetiniń oblystyq departamenti uıymdastyrdy, dep habarlaıdy QazAqparat tilshisi.

Atalǵan shara ońaı oljaǵa qunyqqan azamattardyń tar qapastaǵy tynys-tirshiligimen tanystyrý arqyly memlekettik qyzmetkerlerdiń sybaılas jemqorlyqqa qarsy berik ımmýnıtetin qalyptastyrý maqsatynda uıymdastyryldy. Oǵan Arys, Kentaý, Saıram, Otyrar, Túlkibas jáne Shardara aýdandary ákimderiniń orynbasarlary, apparat jáne derbes bólim basshylary, aýyl ákimderi qatysty. 180-ge jýyq laýazymdy shendi Tólebı

aýdanyndaǵy ICh-167/9 mekemesinde bolyp, onyń ishinde qamaýdaǵylardy ustaý sharttary men ishki tártiptiń qatańdyǵymen tanysty. Qatań tártiptegi sottalýshylardyń jatatyn jeri men medıtsınalyq bólmelerin jáne ashana, aýlalaryn aralap kórdi. Jemqorlyq kórinisterine jol bermeýdi maqsat etken uıymdastyrýshylar laýazymdy tulǵalarǵa kóleńkeli qylmystyń zardabyn túsindirip, qyzmet babyn asyra paıdalanyp aqsha tabýdyń sońy osylaı bolatynyn eskertti. Tula boıdy titirkendiretin temir tordy kórgen shara kýágerleri muzdaı qara qulyp pen tikendi temir tordyń arǵy jaǵyndaǵy ómirdi óz kózderimen kórip, tar qapasta otyrǵan azamattardyń qatelikterin qaıtalamaıtynyn jetkizdi.

Aıta ketsek, Túrkistan óńirindegi bul jumystar jyl sońyna deıin júıeli túrde júrgiziletin bolady. Kelesi tanystyrý jumystaryna oblystyq basqarma basshylary, aýdan-qala ákimderi, bas dárigerler men memlekettik mekeme basshylary qatysady dep josparlanyp otyr.