Túrkistandyq sharýanyń qoıshysy 16 mln teńgeniń malyn satyp jibergen

TÚRKІSTAN. QazAqparat – Ordabasy aýdanynyń turǵyny ózine tıesili asyl tuqymdy júzdegen maldy satyp jibergenin aıtyp, polıtsııaǵa qoıshysynyń ústinen shaǵym túsirdi, dep habarlaıdy QazAqparat tilshisi.

Sharýanyń málimdeýinshe, qoıshy árqaısysy 70 000 teńge turatyn 200-den astam maldy satyp jibergen. Kúdiktiniń jábirlenýshige keltirgen shyǵynynyń jalpy kólemi 16 000 000 teńgeden asady.

«Atalǵan jaıt QR QK-niń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha tirkeýge aldy. Tergeý barysynda kúdiktiniń 2021 jyldan bastap baǵyp júrgen maldaryn, ıaǵnı bótenniń múlkin shetinen sata bergeni anyqtaldy. Ol óziniń nesıeleri men qaryzdaryn óteý úshin qylmysqa barǵanyn moıyndady», - delingen Túrkistan oblysy polıtsııa departamentiniń baspasóz qyzmeti taratqan habarlamada.

Kúdikti qamaýǵa alyndy, oǵan qatysty tergeý amaldary júrgizilip jatyr.