Túrkistandyq sharýalar qoı júnin órtep, terisin qoqysqa tastaýǵa májbúr

TÚRKІSTAN. QazAqparat - Túrkistandyq sharýalar qoı júnin órtep, terisin qoqysqa tastaýǵa májbúr. Bul týraly Saýda jáne ıntegratsııa mınıstri Serik Jumanǵarınmen kezdesken bıznes ókilderi aıtty, dep habarlaıdy QazAqparat tilshisi.

Kezdesýde túrkistandyq sharýalar atynan sóz alǵan Baǵlan Musabekov kópshilikti tolǵandyrǵan máseleni sóz etti.

«Statıtstıka boıynsha óńirde mal bordaqylaýmen aınalysatyn 22 iri qara sharýashylyǵy bar. Olardyń ózinnen jylyna 500 000 tonnaǵa jýyq teri alynady. Al, jekelep soıylyp jatqandary odan da kóp. Bizde kedendik salyq 200 evrony quraıdy. Sol soma 100 evroǵa deıin túsirilse degen usynysymyz bar. Sebebi, biz tórt túliktiń terisi men júnin shet elge shyǵara almaı otyrmyz. Sondyqtan, júndi órtep, terini qoqysqa tastaýǵa májbúrmiz» - dedi ol.

Mınıstr máseleni tekserý jóninde sala mamandaryna naqty tapsyrmalar berdi. Teri men jún óńdeý úlken sala ekendigin jetkizip, aldaǵy ýaqytta atalǵan máseleni sheshý boıynsha jumys júrgiziletindigin aıtty.

Aıta keteıik, búgin QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın Túrkistan oblysynyń turǵyndarymen kezdesti.