Túrkistandyq sharýalar bıylǵy maqta baǵasyna alańdaýly
TÚRKІSTAN. QazAqparat -Túrkistan oblysyna qarasty Maqtaral jáne Jetisaı aýdandarynda «Aq kerýen -2018» agrosharasy ótti. Jıynǵa aýdan ákimderi men maqta óńdeý zaýyttarynyń basshylary, jergilikti dıqandar qatysty, dep habarlaıdy QazAqparat tilshisi.
Kontserttik baǵdarlamamen túńligi túrilgen jıyndy Jetisaı aýdanynyń ákimi Jamantaı Beısenbaev sóz sóılep ashyp, jınalǵandardy kúzgi jıyn-terim naýqanyn joǵary deńgeıde uıymdastyrýǵa shaqyrdy.
Ákimniń sózinshe, bıyl Jetisaı aýdanynda maqtanyń ár gektarynan 25-30 tsentnerden ónim alý josparlanyp otyr. Aýdandaǵy sharýalar Ózbekstannan keletin aǵyn sýdan tapshylyq kórgen joq. Sondaı-aq, bıyl maqta egistikterin hımııalyq emes, bıologııalyq ádispen óńdeý jumystary júrgizildi. Sonyń arqasynda maqta alqaptary zııankesterden asa qatty zııan shekpegen. Maqta baǵasyn kóterý jóninde de zaýyt basshylaryna usynys tastalǵan.
Aıta keteıik, qazir Myrzashóldegi sharýalardy maqta baǵasy alańdatyp otyr. Al, ázirge maqtanyń bir kelisi 170 teńgeden qabyldanyp jatyr.
