Túrkistandyq sharýalar bir alqaptan jylyna 2-3 ret ónim alýda

TÚRKІSTAN. QazAqparat - Ótken jyly Túrkistan oblysynyń klımattyq jaǵdaıyn utymdy paıdalanǵan sharýalar bir alqaptan jylyna 2-3 ret ónim aldy. 9 myń gektarda 2878 joba iske asyp, nátıjesinde 280 myń tonna kókónis ónimi jınaldy, dep habarlaıdy QazAqparat tilshisi.

Óńirde bıylǵy jyly 11 baǵyt boıynsha 33 jobany júzege asyrý kózdelýde. Mundaǵy negizgi baǵyttar jylyjaı kesheni, mal bordaqylaý alańdaryn jáne sút óndirý kólemin arttyrýǵa arnalmaq.

«Memleket basshysy Parlament otyrysyndaǵy málimdemesinde sýbsıdııa alýdy jeńildetýge, onyń ashyq bolýy úshin birqatar tapsyrmalar bergen bolatyn. Osy maqsatta ósimdik sharýashylyǵyndaǵy 4 bıýdjettik baǵdarlamany 1 bıýdjettik baǵdarlamaǵa biriktirýdi usynýdamyz. Bul óz kezeginde naryq qajettiligi men baǵa turaqtandyrýdy qamtamasyz etý maqsatynda naqty qajet daqyldardy egýge baǵyttalǵan joba bolmaq» – dedi Túrkistan oblysy aýyl sharýashylyǵy basqarmasy basshysynyń orynbasary Nurbol Bekmuratov.
Jalpy Túrkistan oblysynda 69 myń sharýa qojalyǵy tirkelgen. Olarda 170 myńnan astam adam eńbek etýde. Bul respýblıkalyq kórsetkishtiń 32% quraıdy. Sonymen qatar, oblysta jańadan 122 gektarǵa jylyjaılar salynyp, óńirdegi jylyjaı kólemi 1 467 gektardy qurap otyr.