Túrkistandyq sharýa qozyquıryq ósirip, qyrýar paıda taýyp otyr
TÚRKІSTAN. QazAqparat - Túrkistan oblysy Saryaǵash aýdany Derbisek aýyl okrýginiń turǵyny Baqkeldi Rahınbaev ataýly áleýmettik kómektiń arqasynda úıinen kásip ashyp, qyrýar paıdaǵa kenelip otyr, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.
Óńirlik kommýnıkatsııalar qyzmetindegi málimetterge qaraǵanda, byltyr Baqkeldi Rahınbaev ataýly áleýmettik kómek arqyly 500 myń teńge alyp, úıiniń qonaq bólmesine 600 qapshyq qozyquıryq uryǵyn ornalastyrǵan. Alǵashqy kezde aptasyna 500-600 keli qozyquıyryq jınap, ár kelisin 1200 teńgeden ótkizipti. Sóıtip, nebári 3 aıda barlyq nesıe qaryzdaryn jaýyp tastaǵan. Al qazir aptasyna 300 keliden ónim alyp, kelisin 500-600 teńge aralyǵynda saýdalaýda.
«Men bul kásippen 3 jyldan beri aınalysyp kelemin. Alǵashynda ózgelerge kómekshi retinde jumys istep júrdim. Ózim ashýǵa qarjy qolbaılaý boldy. Keıinnen úkimetten ataýly áleýmettik kómek beriletinin estip, óz kásibimdi ashýǵa múmkindik týǵanyn estip erekshe qýandym. Sóıtip Ózbekstannan qozyquıryq uryǵyn kerek-jaraǵymen satyp alyp, óz úıimnen shaǵyn oryn ashtym. Qazirgi tabysym kóńilge qonymdy», – deıdi Baqkeldi Rahınbaev.
Baqkeldiniń endigi maqsaty – qozyquıryq qapshyqtarynyń sanyn 3 myńǵa jetkizý. Ol úshin oǵan ylǵaldy jer telimi men 3 mln teńgedeı qarjy qajet. Eki birdeı nesıesin osy kásippen-aq jaýyp tastaǵan ol aldaǵy ýaqytta da bankterden qaryz alýdy josparlap otyr.
Baǵbannyń aıtýynsha, qozyquıryq ónimine Saryaǵash aýdanynda suranys óte kóp eken. Tipti Shymkent qalasynan da arnaıy kelisimshart usynǵandar da bolypty. Osyny eskergen Baqkeldi aldaǵy ýaqytta jergilikti kásipkerlik palatasyna bıznes ıdeıa usynyp, ol jaqtan da 500 myń teńgedeı demeýqarjy alýǵa nıettenip otyr.
