Túrkistandyq polıtseıler zańsyz 100 kelige jýyq balyq aýlaǵan brakonerdi ustady
Brakonerdiń «Toıota kamrı» markaly kóligin tekserý kezinde, júk salǵyshynan 97 sazan, ıaǵnı 100 kelige tarta balyq aıǵaq zat retinde alynǵan. Polıtsııa qyzmetkerleri kúdiktini istiń mán-jaıyn anyqtaý úshin polıtsııa bólimine jetkizdi.
«Tergeý barysynda anyqtalǵandaı, kúdikti buǵan deıin de balyq aýlap, meıramhanalarǵa ótkizip júrgen. Atalǵan jaıtty polıtseıler Qylmystyq Kodekstiń 335-baby 1-bóligi boıynsha (Balyq resýrstaryn, basqa da sý janýarlaryn nemese ósimdikterin zańsyz alý) tirkeýge alyp, qazirgi tańda sotqa deıingi tergep-tekserý amaldaryn júrgizýde», - dep habarlady quzyrly organnan.
Óz kezeginde Túrkistan oblysynyń polıtseıleri azamattarǵa zańsyz balyq aýlaýǵa tyıym salynǵanyn eskertedi. Sondaı-aq Qyzyl kitapqa engen janýarlar men ósimdikterge zııan keltirgender zań aıasynda jaýapqa tartylady.
