Túrkistandyq polıtseıler sport túrlerinen jarys uıymdastyrdy
JETІSAI. QazAqparat - Túrkistan oblysynyń polıtseıleri mereke qarsańynda sport túrlerinen jarys uıymdastyrdy. Jetisaı qalasynda «Qazaqstan polıtsııasy kúni» men polıtsııa polkovnıgi Ábdiǵappar Serikbaevty eske alýǵa arnalǵan jarysta tártip saqshylary voleıboldan jáne shaǵyn fýtboldan baq synady, dep habarlaıdy QazAqparat tilshisi.
Sporttyq sharaǵa Túrkistan oblystyq polıtsııa departamentiniń bastyǵy, polıtsııa general-maıory Qaırat Dálbekov pen aýdan ákimi, marqumnyń jubaıy men ul-qyzdary, oblys boıynsha jınaqtalǵan komandalar qatysty.
Salaýatty ómir saltyn nasıhattaıtyn jarysqa Jetisaı, Saryaǵash, Maqtaaral, Túlkibas aýdandarynyń polıtseıleri men Jetisaı aýdandyq sotynyń, Ulttyq qaýipsizdik komıtetiniń, aýdandyq prokýratýranyń, bilim bóliminiń jáne aýdan stýdentterinen quralǵan komandalar baq synasty. Eki kúnge sozylǵan jarysta fýtbol oıynyna 6 komanda qatysyp, ozyq oıyn úlgisin kórsetti. Nátıjesinde birinshi orynǵa Jetisaı aýdany Asyq ata kentiniń polıtsııa bólimshesiniń saqshylary ıe boldy. 
Al, voleıbol boıynsha barlyǵy 9 komanda qatysyp, sporttyq oıyn tartysty da qyzyqty ótti. Kórermender qoldaý bildirip, sportshylardyń shabytty oıynymen qyza túsken jarysta 3 komanda aqtyq synǵa shyqty. Qaýipti qyzmet pen jaaýpkershiligi mol salada júrgen tártip saqshylary ózderiniń sportqa degen qulshynystaryn kórsetip, nátıjesinde arnaıy ázirlengen kýbok pen birinshi oryndy Jetisaı APB komandasy jeńip aldy. Barlyq jeńimpazdarǵa arnaıy kýboktar men gramotalar tabystaldy.
Saıysta baq synaǵan komandalardyń ishinen úzdik shyqqan oıynshylarǵa da arnaıy alǵys hattar úlestirildi.
