Túrkistandyq polıtseıler ózine qol jumsamaq bolǵan kelinshekti raıynan qaıtardy
TÚRKІSTAN. QazAqparat – Túrkistan oblysy, Jetisaı qalasynda ózine qol jumsamaq bolǵan jas kelinshekti polıtseıler qutqaryp qaldy. Aýdan turǵyny sýıtsıdke barýyna otbasylyq jaǵdaıy ıtermelegenin aıtqan, dep habarlaıdy QazAqparat tilshisi.
Jetisaı aýdandyq polıtsııa bólimine jolaı ótip bara jatqan júrginshi habarlasyp, beıtanys kelinshektiń kópirde sýıtsıd jasaýǵa bekingeni týraly habarlaǵan.
«Oqıǵa ornyna birden patrýl polıtsııasynyń avtoekıpajy jóneltildi. Olar kópirden sekirý arqyly ózine qol jumsamaq bolǵan jas kelinshekti kórip, ýaqytty kóp sozbaı iske kiristi. Jol-patrýl polıtsııa qyzmetkerleri - aǵa serjant E.Berdibekov pen serjant T.Beısenbaev shapshańdyq tanytyp, jalma-jan kelinshekke kómekke umtyldy. Sóıtip ony sýıtsıdten qutqardy» delingen habarlamada.
Kelinshek Jetisaı aýdanynyń turǵyny bolyp shyqty. Óziniń aıtýynsha, ony sýıtsıdke otbasylyq jaǵdaıy ıtermelegen. Polıtseıler kelinshekpen áńgimelesip, kómek qolyn sozǵan soń, ony týǵan-týystaryna tabystady.
Óz kezeginde jas kelinshektiń týystary Jetisaı aýdandyq polıtsııa bóliminiń basshylyǵy men qyzmetkerlerine kásibı biliktilik pen qyraǵylyq tanytqany úshin alǵys aıtty.
