Túrkistandyq polıtseıler ózbekstandyq áriptesterimen birlesip áreket etetin boldy
TÚRKІSTAN. QazAqparat - Shymkentte Ózbekstan Respýblıkasynyń ІІM ókilderi men Túrkistan oblysy jáne Shymkent qalalyq Polıtsııa departamenti basshylarynyń ekijaqty kezdesýi ótti.
Basqosýda taraptar ekstremızmge qarsy kúres jáne zańsyz kóshi-qon salasyndaǵy shekaralyq yntymaqtastyq máselelerin talqylady, dep habarlaıdy QazAqparat tilshisi.
Kezdesýge QR ІІM Shtab bastyǵy, polıtsııa polkovnıgi Qaırat Súıinbaev pen Túrkistan oblystyq PD bastyǵy, polıtsııa polkovnıgi Qaırat Dálbekov bastaǵan departament basshylyǵy jáne Saryaǵash, Keles, Maqtaral, Shardara jáne Jetisaı aýdandyq polıtsııa bólimderiniń bastyqtary qatysty. Ózbekstandyq delegatsııa tarapynan ІІM Uıymdastyrý departamentiniń bastyǵy Shýhrat Norgıtov jáne shekaralyq Jızaq, Tashkent jáne Syrdarııa oblystarynyń bastyqtary general-maıor Gaırat Kadırov, polkovnık Tohtar Arıpov, polkovnık Mýhıtdın Jýraev bastap keldi.
Kezdesý barysynda tártip saqshylary eki eldiń ishki ister organdarynyń qylmysqa qarsy kúres salasyndaǵy ózara baılanysty aldaǵy ýaqytta jandandyrý máselelerin sóz etti. Óıtkeni búgingi tańda transulttyq esirtki tasymalynyń ósý qaýpi týyndap otyr. Kóshi-qon protsesteri qıyndap, krımınogendik ahýal birlese otyryp jumys isteýdi talap etip otyr.
Ekijaqty kezdesýdiń nátıjesinde qatysýshylar ekstremızmge qarsy is-qımyl men jedel-profılaktıkalyq is-sharalardy uıymdastyrý, kóshi-qon máselesi boıynsha aqparattar almasýǵa ýaǵdalasty. Budan bólek, esirtki tasymaldaý men bótenniń múlkin urlaý, avtokólikti zańsyz ıelený sııaqty birqatar máseleler boıynsha usynystar aıtyp, pikir almasty.
Kezdesý sońynda Qazaqstan men Ózbekstan ІІM ókilderi qylmyspen kúres jáne shekaralyq yntymaqtastyq salasy boıynsha birlesip uıymdastyrylatyn jáne is júzinde júzege asyrylatyn máseleler boıynsha birqatar qujattarǵa qol qoıdy.
