Túrkistandyq polıtseıler mektep janyndaǵy kólik qozǵalysyn qadaǵalaýǵa kiristi
TÚRKІSTAN. QazAqparat – Túrkistan oblysynda polıtseıler mektepterdiń janynda jol qozǵalysyn qadaǵalaýǵa kiristi. Endi bir aı kóleminde árbir jergilikti polıtsııa qyzmetiniń qyzmetkeri men ýchaskelik polıtseı jaıaý júrginshiler jolaǵynan ótetin oqýshylarǵa joldan ótýge kómektesedi, dep habarlaıdy QazAqparat tilshisi.
Óńirde 480-myńǵa jýyq oqýshysy bar 904 mektep bar bolsa, olarǵa 1 myńnan astam polıtsııa qyzmetkeri jumyldyryldy. Olar tańǵy saǵat 7-den bastap mektep aldynda turyp balalardyń qaýipsizdigin qadaǵalaýda. Osylaısha ata-analar da mektep aldyndaǵy jolaqtan kúndelikti ótetin balalarynyń qaýipsizdigine alańdamaıtyn boldy.
«Abaılańyz, balalar!» aktsııasy aıasynda sondaı-aq, polıtsııa basshylary men olardyń orynbasarlary jáne qatardaǵy qyzmetkerleri mektepterde bilim alýshylarǵa arnaıy túsindirme jumystaryn júrgizýde.
