Túrkistandyq polıtseıler besinshi qabattan sekirmekshi bolǵan áıeldi aman alyp qaldy
TÚRKІSTAN. QazAqparat – Túrkistan qalasynyń tártip saqshylary joǵary qabattan sekirip ketpek bolǵan áıeldi aman alyp qaldy, dep habarlaıdy QazAqparat Túrkistan oblystyq Polıtsııa departamentiniń baspasóz qyzmetine silteme jasap.
Baspasóz qyzmeti taratqan málimetterge qaraǵanda, Túrkistan qalalyq polıtsııa basqarmasynyń kezekshi bólimine jergilikti turǵyn, belgisiz áıeldiń ózin jaısyz sezinip, ólgisi keletinin aıtqany týraly habar bergen.
Osy habar boıynsha oqıǵa ornyna shuǵyl jetken jedel-tergeý toby belgisiz áıeldiń kópqabatty turǵyn-úıdiń 5-shi qabatyndaǵy balkonnan sekirýge oqtalyp turǵanyn kóredi.
Ýchaskelik polıtsııa ınspektory, maıor Bolat Orazbekov, polıtsııa leıtenanty Qaırat Narmýhamedov pen Nurǵısa Jumabaı tez arada jospar quryp, áreketke kiristi. Polıtsııa maıory Bolat Orazbekov áıeldi sózge tartyp, qaýipsizdik sharalaryn júzege asyryp, onyń sekirýine kedergi keltirip tursa, polıtsııa leıtenantary Nurǵısa men Qaırat qulyptaýly páterdiń esigin buzyp kirip, ólgisi kelgen áıeldi balkonda salbyrap turǵan jerinen qutqaryp qaldy. Inspektorlar áıeldi qaýipsiz jerge shyǵaryp, medıtsınalyq kómek kórsetti.
Atalǵan jaıt Túrkistan QR QK-niń 105-baby «Ózin-ózi óltirýge deıin oqtalý» boıynsha tirkelip, sotqa deıingi tergeýdiń biryńǵaı tizilimine engizildi. Tekserý barysynda, áıel ómirge qapala ekenin, densaýlyǵy bolmaı júrgenin, azyn-aýlaq turmystyq máselelerdi kótere almaı qalyp, óziniń ne istegenin baıqamaı qalǵanyn aıtady.
Polıtseıler áıeldiń ómirin saqtap qalýmen qatar, dárigerler men psıhologty shaqyrtyp, qajetti sharalardy júzege asyrdy.
