Túrkistandyq polıtseıler balalardy jańa jylmen quttyqtady
TÚRKІSTAN. QazAqparat - Túrkistan oblysy Polıtsııa departamentiniń polıtseıleri «Jańa jyl» merekesine oraı qalanyń bas shyrshasyna jınalyp, balalarǵa erekshe tartý jasady, dep habarlaıdy Túrkistan oblystyq Polıtsııa departamentiniń baspasóz qyzmeti.
Aıaz ata men Aqshaqar, túrli jan-janýarlar keıpine engen tártip saqshylary ózderiniń quttyqtaý sózderin aıtyp, balalarmen birge shyrshany aınala án shyrqap, bı bıledi. Keshki ýaqytta serýendeýge kelgen árbir qala turǵynyna keremet kóńil-kúı syılady.
Merekeniń basty keıipkeri Aıaz Atanyń syılyqqa toly qorjynyn kórgen balalar jarysa ónerlerin kórsetti. Biri taqpaǵyn tartý etse, biri ásem ánin shyrqady. Aıaz Ata árbir balanyń ónerin baǵalap, daıyndap kelgen syılyqtaryn úlestirdi. Osylaısha merekelik baǵdarlama qystyń aıazdy kúnine qaramastan birshama ýaqytqa sozylyp, jınalǵan kópshiliktiń kóńilinen shyqty.
Óz kezeginde ata-analar ortaǵa shyǵyp, polıtseı Aıaz Ata men Aqshaqarǵa alǵystaryn jetkizdi.
«Qalanyń bas shyrshasyn tamashalaýǵa otbasymyzben kelgen edik. Polıtseılerdiń tosynsyıyna tap boldyq. Ul-qyzdarymyz Aıaz Atanyń qolynan alǵan syılyqqa máz-meıram. Mereke qarsańynda turǵyndar úshin ýaqyttaryn bólip, kóńilimizdi kótergen oblys polıtseılerine rızashylyǵymyzdy bildiremiz»-degen turǵyndardyń bal-bul janǵan júzderinen qýanysh sezimi sezilip turdy.
Mundaı is-shara alǵash ret uıymdastyrylyp jatqan joq. Polıtseıler jyl saıyn balalardy qýantýǵa asyǵady. Oblysqa qarasty qala, aýdandarda da merekelik sharalar ótkizilip, turmysy tómen, az qamtylǵan otbasylarǵa azyq-túlikter jetkizilip, qaıyrymdy is jalǵasyp otyrady.
