Túrkistandyq polıtseıler 20 myńnan asa halyqtyń aryz-shaǵymyn tyńdady
TÚRKІSTAN. QazAqparat – Túrkistan oblysynda polıtseıler 20 myńnan asa turǵynnyń aryz-shaǵymyn tyńdady. Azamattar óz ýájin sáýir aıynda bastaý alǵan «Jolda qabyldaý» aktsııasy aıasynda jetkizdi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, aktsııa aıasynda kómekke júgingenderdiń máseleleri jedel túrde sheshilgen. Al, qarasha aıynda kezekti ret ótken aktsııa barysynda oblys ortalyǵyndaǵy kóshelerge beınebaqylaý kameralary ornatylǵan. Túrli quqyq buzý faktileriniń aldyn alatyn jumystar jandanýda. Júrgizýshilerdiń óreskel zańbuzýshylyqtary áp-sátte tirkelip, aıyppul salynyp otyrady.
Kezekti aktsııaǵa kelgen turǵyndardyń basym kópshiligi osy syndy máselelelerin polıtseılerge jetkizgen. Kezeksiz kez kelgen turǵyndy qabyldaǵan tártip saqshylary azamattardyń máseleleriniń tez arada sheshilýine sep bolýda.
Odan bólek áleýmettik jelidegi departamenttiń resmı paraqshalarynda osy saryndy suraqtar kóptep kezdesip, naqty jaýaptar berildi. Óz kezeginde tikeleı qabyldaý júrgizgen Túrkistan oblysy polıtsııa departamenti bastyǵynyń orynbasary, polıtsııa polkovnıgi Abdýǵanı Seıdýalıev mundaı aktsııany uıymdastyrýdyń halyq úshin paıdasy zor ekenin, halyqpen qarym-qatynasty kúsheıtetinin atap ótti.
Aıta keteıik, óńirdegi barlyq qala-aýdandardyń jáne Túrkistan qalasynyń 2 móltek aýdanynda «Aýlada qabyldaý» aktsııasy uıymdastyryldy.
