Túrkistandyq polıtseı tasqyn sýǵa batyp bara jatqan turǵyndy qutqardy
Oqıǵa 2 aqpan kúni bolǵan. Saýran aýdanyn sý alǵan sátte, Shaǵa aýylynda kezekshilikte júrgen ýchaskelik polıtsııa ınspektory Abaı Baıjuman belgisiz er adam tasqyn sýǵa qulap ketkenin kórgen.
Birden kólikti toqtatqan ol kıimmen sýǵa kirip, aǵyn sýdyń ortasynda bolǵan er azamatty qaýipsiz jerge alyp shyqqan. Keıin qutqarylǵan adamdy jedel járdem qyzmetkerleri aýrýhanaǵa alyp ketken.
«Qıyn sátte Túrkistan oblysynyń polıtseıleri judyryqtaı jumylyp, azamattardy evakýatsııalaýǵa jáne olardyń múlkin qorǵaýǵa atsalysyp jatyr. Máselen, nebary 2 kún ishinde Túrkistan oblysynyń polıtseıleri arnaıy mamandarmen birge 200-den astam adamdy evakýatsııalap, qaýipsiz jerge alyp shyqty», - delingen Túrkistan oblysy Polıtsııa departamentiniń baspasóz qyzmeti taratqan aqparatta.
2 aqpanda Túrkistan oblysynyń birneshe aýdanyn sý basqan bolatyn. Adamdar evakýatsııalanyp, óńirge Tótenshe jaǵdaılar mınıstri ıÝrıı Ilın ushyp shyqty.
Saýran aýdanynda mektep oqýshylary onlaın oqýǵa kóshti. Sondaı-aq osy aýdanda 7 balabaqsha jumysyn toqtatty. Túrkistan oblysynyń ákimi Darhan Satybaldy sý kirgen eldi meken turǵyndarymen kezdesti.
Búgin málim etilgendeı, Saýran aýdanynyń evakýatsııalanǵan turǵyndary úılerine orala bastady. Tótenshe jaǵdaılar mınıstri ıÝrıı Ilın atalǵan aýdanda tótenshe jaǵdaı jarııalanýy múmkin ekenin aıtty.
Sondaı-aq Tótenshe jaǵdaılar birinshi vıtse-mınıstri Ibragım Kúlshimbaev Ortalyq kommýnıkatsııalar qyzmetinde ótken brıfıngide Túrkistan oblysyndaǵy sý tasqynyna qatysty sońǵy málimetterdi jarııalady.
«Qazir respýblıkanyń ońtústik óńirlerinde, onyń ishinde Túrkistan oblysynda sý tasqyny jaǵdaıy kúrdelene tústi. 1-2 aqpanda qatty jaýyn-shashyn men temperatýranyń 7-8 gradýsqa deıin kóterilýi nátıjesinde atalǵan oblystyń 4 aýdanyn taýdan erigen qar sýlary shaıa bastady. Atap aıtqanda, Saýran, Ordabasy, Sozaq jáne Báıdibek aýdanynyń aýmaǵy. Sondaı-aq Arys jáne Kentaý qalalary da bar. Saldarynan 21 eldi meken jáne 234 aýla aýmaǵy sý astynda qaldy», - dedi ol.
Sondaı-aq onyń aıtýynsha, sý tasqynynan úıler qulasa, shyǵyn jergilikti bıýdjetten óteletinin aıtty.
Jalpy aǵyn sý saldarynan oblystyq mańyzy bar 10-nan astam jol búlingen.
Foto: t.me/POLICE_of_KZ
