Túrkistandyq polıtseı órtten múmkindigi shekteýli jan men sábıdi qutqardy
TÚRKІSTAN. QazAqparat - Túrkistanda ýchaskelik polıtsııa ınspektory órt shyqqan páterden múmkindigi shekteýli azamat pen 5 jasar qyzdy qutqardy, dep habarlaıdy QazAqparat Polisia.kz saıtyna silteme jasap.
Polıtsııa kapıtany Oljas Ersultanov órt bolǵan páterge kirip, tósek tartyp jatqan múgedek er adam men 5 jas shamasyndaǵy qyz balany alyp shyqqan. Keıin órt sóndirýshiler kelgenshe otty óz betimen sóndirgen.
«Biz, osy aýmaqtyń turǵyndary polıtseıdiń erligine kýá boldyq. Osyǵan baılanysty bul batyr polıtseıge alǵys bildiremiz. Ol osy qyzmetke taǵaıyndalǵaly beri aýlamyz tynysh, quqyq buzýshylyq kóp bolmaıdy, jalpy eńbegi adal. O.Ersultanovtyń eren eńbegin baǵalap, ony marapattaýyńyzdy suraımyz», – dep jazylǵan polıtsııa qyzmetine turǵyndardan kelip túsken hatta.
Oljas Ersultanovtyń aıtýynsha, basty maqsat adam ómirin arashalap qalý bolǵan.
«Kúndelikti aýlalardy aralap, turǵyndardyń qaýipsizdigi úshin qyzmette júrgen bolatynmyn. Kenet kópqabatty úıdiń 2-qabatyndaǵy páterden órt shyǵyp jatqanyn baıqadym. Dereý oqıǵa ornyna jetip, úıge kirip kettim. Kirsem, páterdiń jatyn bólmesi órtenip, ishi kók tútin bolyp jatyr eken. Soǵan qaramastan, páterde adam bolýy múmkin, kómek kerek shyǵar dep oıladym. Úıden ózdiginen júrip-tura almaıtyn múmkindigi shekteýli er adam men 5 jas shamasyndaǵy kishkentaı qyzdy taýyp, ekeýin de qaýipsiz jerge shyǵardym. Alǵashqy medıtsınalyq kómek kórsettim. Eń birinshi maqsat – jedel áreket etý, adam ómirin arashalap qalý boldy», - deıdi Túrkistan qalalyq polıtsııa basqarmasy №4 ýchaskelik polıtsııa pýnktiniń ýchaskelik polıtsııa ınspektory Oljas Ersultanov.
Foto: polisia.kz
