Túrkistandyq palýan «jigit sultany» atanyp, 1 mln teńgeni jeńip aldy
TÚRKІSTAN. QazAqparat - Shyǵys Qazaqstan oblysy, Kókpekti aýdanynda «Tolaǵaı sultan-2019» halyqaralyq sporttyq-shyǵarmashylyq saıysy ótti, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Jyl saıyn oblys kóleminde ótetin saıys bıyl halyqaralyq deńgeıde uıymdastyryldy. Elimizdiń ár oblysymen qatar, Mońǵolııa memleketinen de jalpy bilekti de bilimdi ári ónerli 23 jigit baq synasty. Eki kúnge sozylǵan jarysta jamby atý, teńge ilý, aýdaryspaq, qazaq kúresi, qol kúres, ózin tanystyrý, óner, suraq-jaýap syndy 8 túrli básekeden saıystar ótti. Alǵashqy kúni sporttyq saıysta bilek kúshi synalsa, ekinshi kúni sportshylardyń bilimi men oı órisi synǵa túsip, ónerlerin ortaǵa saldy.
Óneri men bilimi, bula kúshi men eptiligi elden asqan 23 jigit shyǵys jurtyn sporttyq saıystyń qyzyǵyna batyryp, Kókpekti aýdanynyń aspanyn ánmen jyrǵa bóledi.
Osy saıysta Túrkistan oblysynyń namysyn Sozaq aýdanynyń týmasy Ákbar Elýbaıuly qorǵady. Naǵyz jigittiń qasıeti synalar saıysta qarsylastarynan oq boıy oza shapqan Ákbar Elýbaıuly qazaq kúresinen birinshi oryn aldy. Dúbirli dodada 120 kelilik taıynshany 20 ret kóterip, jıylǵan jurtty tánti etti. Suraq-jaýap saıysynda da bilimi men biligin kórsetti.
Ákbar Elýbaıuly erkin kúrestiń ǵana sheberi emes, jigittiń sultany ekenin dáleldep, «Tolaǵaı sultan-2019» halyqaralyq sporttyq-shyǵarmashylyq saıysynda 1-oryn alyp, 1 mln teńge ıelendi.
Eske sala keteıik, biz buǵan deıin Shyǵys Qazaqstanda jigit sultany ótip jatqanyn habarlaǵan bolatynbyz.
