Túrkistandyq otbasyna «úı-ishimen koronavırýs juqtyrǵan» dep jala japty
TÚRKІSTAN. QazAqparat - Túrkistan qalasynyń polıtsııa departamentine jergilikti turǵyn aryzdandy, dep habarlaıdy Polisia.kz.
Belgisiz bireýler WhatsApp messendjeri arqyly onyń otbasymen koronavırýs juqtyrǵany týraly jalǵan aqparat taratyp jibergen.
Atalǵan jaıt QR Qylmystyq kodeksiniń 274-baby «Kórineý jalǵan aqparat taratý» boıynsha sotqa deıingi tergep-tekserýdiń biryńǵaı tizilimine tirkeldi.
Tekserý kezinde jábirlenýshi otbasymen birge Eýropada saıahat jasaǵanyn habarlady. Almaty qalasyna kelgen soń áıel men onyń otbasyn dárigerler tolyq tekserýden ótkizip, qarap shyǵyp, karantınge jatqyzýǵa esh negiz bolmaǵan.
Úıine kelgennen keıin Túrkistan qalalyq emhana men SES qyzmetkerleri bul otbasymen baılanys ornatyp, tekseredi, biraq kúni búginge deıin aýrýdyń belgileri jáne basqa da aýrý túrleri anyqtalmaǵan. Qazirgi ýaqytta jábirlenýshi men onyń otbasy músheleri baqylaýdan alyndy.
Jedel-izdestirý barysynda polıtsııa qyzmetkerleri jalǵan aqparat taratýshy Túrkistan qalasynyń turǵyndaryn, ıaǵnı úsh kúdiktini anyqtap, ustady. Kúdiktiler óz áreketin tolyq moıyndap, ókinetinin jetkizdi. Olar bul habardy týystary men jaqyndaryna eskertý úshin taratqanyn túsindirdi.
Osy jaıt boıynsha sotqa deıingi tergeý amaldary júrgizilip jatyr. Polıtseıler istiń tolyq mán-jaıyn anyqtaýdy bastady.
