Túrkistandyq otbasy zańdy úıine kire almaı júr: Ákimdik isti baqylaýǵa aldy
Kezdesý «Open Space» formatyndaǵy qoǵamdyq qabyldaýda ótti.
«Partııa usynǵan múmkindikti paıdalanyp, oblystyń túkpir-túkpirinen kelgen jıyrmaǵa jýyq turǵyn ózderin mazalaǵan máseleler boıynsha talap-tilekteri men aryz-shaǵymdaryn aıtyp keldi. Birqatar ótinish sol sátte sheshimin tapty», - dedi partııa fılıalynan.
Máselen, birneshe jyldan beri úı kezeginde turǵan Túrkistan qalasynyń turǵyndary A.Atekeva men A.Nysambaeva baspana problemasymen kelgen. Olarǵa jyldyń aıaǵynda kezekke saı úı beriletini habarlandy.
«Al Túrkistan qalasynyń turǵyny G. Jadılovanyń otbasyna 2017 jyly úı berilgen. Biraq úı ıeleri muny 2019 jyly bilgen. Ózderine tıesili úıge barsa, basqa adamdar turyp jatqanyn kóredi. Zańdy baspanasyna kire almaı júrgen turǵynnyń janaıqaıyn tyńdaǵan Qosman Qaıyrtaıuly bul máseleni nazarda ustaıtynyn jetkizdi. Búginde atalǵan úıge baılanysty jalǵan qujat jasaý boıynsha qylmystyq is qozǵalǵan. Taıaýda úıdi zańsyz ıemdengender sot arqyly májbúrlep shyǵarylmaq», - delingen taratylǵan habaralmada.
Al Arys qalasynan kelgen S. Mýsaeva jarylystan zardap shekken úıin jóndeý máselesin qozǵasa, Q. Begalıeva kásipkerlik ǵımaratyn jóndeýge kómek suraı kelgen. Oblys ákiminiń birinshi orynbasary Arysqa arnaıy baryp, úıdi tekserýge tapsyrma beretinin, al kásipkerlik nysan boıynsha kásipkerler palatasyna habarlanatynyn aıtty.
Elektr jaryǵy máselesin qozǵaǵan Eski Iqan turǵyny E.Kýrbanhadıevke bul túıtkildiń 2020 jyly sheshiletini, oǵan arnaıy 22 mln teńge qarjy qaralǵany aıtyldy. Úıine gaz kirgizýge qarjylaı kómek suraǵan túrkistandyq kópbalaly ana J.Abdýllaevaǵa nesıe berý máselesi sheshiletin bolsa, Keles aýdanynan kelgen A.Kóbegenovaǵa da ataýly áleýmettik kómek, sý máselesin sheshý boıynsha kómek kórsetiletin boldy.
Ózge de birneshe turǵynǵa tıisti keńes berilip, aýdan, qala ákimderi men basqarma basshylaryna tapsyrmalar júkteldi. «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev qoǵamdyq qabyldaýǵa kelgen turǵyndardyń talap-tilekteriniń oryndalý barysy partııa baqylaýynda bolatynyn jetkizdi.
Búginde «Nur Otan» partııasy Túrkistan oblystyq fılıalynyń «Open Space» formatyndaǵy qoǵamdyq qabyldaýy bılik pen buqarany toǵystyratyn alańǵa aınalyp úlgerdi. Munda aldaǵy ýaqytta ózge de sala basshylar kelip, turǵyndardyń suraqtaryna jaýap beredi.
