Túrkistandyq ónerpazdar sheteldegi 18 kontsertke qatysqan
TÚRKІSTAN. QazAqparat - Túrkistandyq ónerpazdar bir jyl ishinde shetelde ótken 18 kontsertke qatysqan. Bul týraly oblystyq Mádenıet jáne tilderdi damytý basqarmasy basshysynyń mindetin atqarýshy Asylhan Temirhan málimdedi, dep habarlaıdy QazAqparat tilshisi.
Onyń sózinshe, ótken jyly Sh.Qaldaıaqov atyndaǵy oblystyq fılarmonııa men «Túrkistan saraıy» kontserttik uıymynda 373 kontsert pen mádenı is-shara ótkizilgen. Jergilikti ónerpazdar 18 gastroldik is-saparǵa shyqqan.
«Jahandyq zamanaýı Qazaqstandyq mádenıet» baǵyty boıynsha oblysymyzdyń mádenıeti men ónerin shetelderge tanystyrý maqsatynda oblys ónerpazdary «Kastamoný - Túrki áleminiń mádenı astanasy» jylynyń aıasynda Túrkııa Respýblıkasynyń Kastamoný, Ankara, Ystambul qalalarynda, Japonııada 18 kontsertke qatysty.
Sonymen qatar, esepti merzimde oblys ónerpazdary Fınlıandııa, Shvetsııa, Estonııa, Reseı, Italııa, Grýzııa, Túrkııa, Moldova, Qyrǵyzstanda ótken túrli janrdaǵy halyqaralyq baıqaýlar men festıvalderge qatysyp, júldeli oryndardan kórindi»,- dedi Asylhan Temirhan.
Budan ózge óńirdiń bıshileri halyqaralyq baıqaýlarǵa qatysyp, júldeli oryndardy ıelendi. Atap aıtqanda, «Túrkistan» saraıynyń «Farab» bı ansambli Túrkııa memleketiniń Inıgol qalasynda ótken halyqaralyq «Mádenıet jáne óner ujymdary» konkýrsynda І oryndy ıelengen. Sondaı-aq, Býrsa qalasynda ótken 32-shi halyqaralyq «Altyn Qarakóz» konkýrsynda arnaıy júldemen marapattalǵan.
Illıýstratsııalyq sýret
