Túrkistandyq óndirýshilerdiń Eýroodaq naryǵyna shyǵýyna ne kedergi
TÚRKІSTAN. QazAqparat - Túrkistan oblysy ákiminiń orynbasary Ebol Tasjúrekov oblystaǵy 30-dan asa eksporttyq áleýeti bar kásipkermen kezdesip, olardyń jeke qajettilikterimen tanysty, dep habarlaıdy QazAqparat oblys ákiminiń baspasóz qyzmetine silteme jasap.
Jıynǵa Túrkistan oblysynyń kásipkerlik jáne ındýstrıaldy-ınnovatsııalyq damý basqarmasy jáne kedendik deklaratsııany baqylaý bóliminiń basshylary, sondaı-aq, «KazakhExport» eksporttyq saqtandyrý kompanııasy» AQ, «Atameken» RKP» AQ, «Aýyl sharýashylyǵyn qarjylaı qoldaý qory» aktsıonerlik qoǵamynyń jáne «Agrarlyq nesıe korporatsııasy» aktsıonerlik qoǵamynyń Túrkistan aýdany boıynsha aımaqtyq fılıaldary jáne «OŃTÚSTІK» AIO ókilderi qatysyp, óz taraptarynan esporttaýshy kompanııalarǵa kórsetetin qyzmetteri týraly málimdedi.
Elimizdiń ekonomıkasyn damytýda otandyq ónimderdiń eksportqa shyǵýy joǵary mańyzǵa ıe ekendigin tilge tıek etken Erbol Qýanyshuly kásipkerlerdiń eksporttyq áleýetin kóterý boıynsha arnaıy jumys toby qurylǵanyn jetkizdi.
«Qazirgi tańda kásipkerlerdiń kórshi elder naryǵyna kirýine belgili tosqaýyldar bar. Olar - óndiris kóleminiń jetkiliksizdigi, tasymaldaý máseleleriniń jolǵa qoıylmaýy nemese kedendik kedergiler. Mine, osyndaı máselelerdi sheshýde qoldaý kórsetip, kompanııanyń eksportqa shyǵýyna deıin súıemeldeý maqsatynda biz arnaıy jumys tobyn qurdyq. Jumys toby «OŃTÚSTІK» aımaqtyq ınvestıtsııalyq ortalyǵynyń mamandarynan quralǵan», - dedi oblys ákiminiń orynbasary.
Búgingi tańda Túrkistan oblysy boıynsha 50 áleýetti eksporttaýshy kompanııa bar. Olar taýarlaryn Eýroodaq elderine, Qytaı jáne Ortalyq Azııa memleketterine eksportqa shyǵarýda. Alaıda, eksport kólemin arttyryp, jalpy shetel naryǵyna shyǵýda kedergiler joq emes. Kezdesý barysynda kásipkerler kedendik rásimdeý protsedýrasyn jeńildetý, óndiris kólemin arttyrýǵa qarjylaı kómek kórsetý jáne eksporttyq kelisim-sharttardy saqtandyrý boıynsha qoldaý qajettigin aıtty.
Atalǵan máseleler tıisti sala mamandaryna júktelip, oblystyq ákimdik tarapynan baqylaýǵa alynatyn boldy. Jıyn sońynda kásipkerler barlyq damý ınstıtýttarynyń basshylarymen kezdesip, qajetti aqparattarmen qamtamasyz etildi.
