Túrkistandyq oqýshylar IX jazǵy spartakıada jeńimpazy atandy
ASTANA. QazAqparat - Jýyrda Qyzylorda qalasynda QR mektep jáne kolledj oqýshylary arasyndaǵy IX jazǵy spartakıadasynyń jabylý saltanaty ótti, dep habarlaıdy oblystyq ákimdiktiń baspasóz qyzmeti.
Dúbirli syndy Qazaqstan Respýblıkasynyń Bilim jáne ǵylym mınıstrligi uıymdastyrǵan bolatyn. Tórt aıdan astam ýaqytqa sozylǵan synda Túrkistan oblysynyń sportshylary jalpykomandalyq esepte birinshi oryndy jeńip aldy.
Túrkistannyń talantty órenderi 20 altyn, 6 kúmis jáne 6 qola medal enshiledi. Ekinshi oryndy Almaty qalasynyń sportshylary jeńip alsa, úzdik úshtikti Qyzylorda quramasy túıindedi. Jeńimpaz komandaǵa kýbokty Qazaqstan Respýblıkasynyń Bilim jáne ǵylym mınıstrligi «Ulttyq ǵylymı - praktıkalyq dene tárbıesi ortalyǵynyń» dırektory Sadyq Mustafaev tapsyryp, jańadan qurylǵan Túrkistan oblysynyń bul jetistigin tarıhı jeńis dep baǵalady.
Sportshylardy spartakıadaǵa oblystyq bilim basqarmasyna qarasty ádistemelik ortalyq pen deneshynyqtyrý jáne sport basqarmasy birlesip daıyndady. Bilikti bapkerlerdiń eńbegi esh ketpeı, túrkistandyq jastar respýblıkada teńdessiz ekenderin dáleldedi. Eki jylda bir keletin spartakıadada top jarǵan sportshylar endi halyqaralyq saıystarǵa daıyndalady.
