Túrkistandyq naýqasqa Koreıada kúrdeli ota jasaldy

Qaıyrymdylyq sharasy Pýchon qalasynda ornalasqan «SýnChonHıan» (SCH Soon Chun Hyang University Bucheon Hospital) klınıkasynyń basshylyǵy men Túrkistan oblystyq qoǵamdyq densaýlyq basqarmasynyń basshysy Muqan Egizbaevtyń arasynda qol qoıylǵan memorandým aıasynda júzege asty. Jıyrma tórt jastaǵy otandasymyz qoıan-jyryq qasqyr tańdaı dıagnozynyń aýyr túrimen týǵan. Oǵan sábı kezinen bastap Qazaqstanda birneshe ret ota jasalynǵan.

Qaıyrymdylyq sharasy aıasynda túrkistandyq naýqasqa aýyr operatsııany «SýnChonHıan» klınıkasynyń myqty plastıkalyq hırýrgtarynyń biri, professor Nam Syng Mın jasady. Naýqastyń medıtsınalyq tekserýin, operatsııasy men barlyq shyǵyndardy koreıalyq tarap tolyǵymen óz moınyna alǵan.

Dárigerlerdiń tańdaýy Aqnurǵa túskeni beker emes. Ol - kópbalaly otbasynyń tuńǵyshy. Úshinshi top múgedegi. Osydan bir aı buryn anasy dúnıeden ozdy. Onsyz da bet kelbetiniń kemistigimen taýqymet keshken naýqasqa bul úlken demeý bolyp otyr.

«Bar armanym - qurbylarym sekildi anyq sóılep, erkin tynys alý edi. Durys tamaqtana almaı da qınalmyn. Koreıa eline kelip úmitimniń aqtalǵanyna qýanyshtymyn. Maǵan qoldaý kórsetip osynda joldaǵan jergilikti dárigerlerge jáne ota jasaǵan professorǵa sheksiz alǵysymdy bildiremin. Tek osydan bir aı buryn qaıtys bolǵan anamnyń osy qýanyshymdy kóre almaǵany janyma batady», - deıdi Aqnur Saparbaı.

Ota tórt saǵatqa sozyldy. Professor Nam Syng MIN otanyń sátti ótkenin aıtady. Alda áli biraz ýaqyt kútim kerek. Kóp jylǵy arman - úmittiń aqtalǵan qýanysh sezimi Túrkistan týmasynyń júreginde.

«Medıtsına qarqyndy damyǵan zamanda mundaı jaǵdaıǵa túsken adamdy kúızeliske ushyratpaı, qol ushyn sozý ıgi is», - deıdi koreıalyq dáriger.

Qoıanjyryq – týabitken, tuqym qýalaıtyn kesel. Oǵan júktiliktiń alǵashqy aılarynda ananyń juqpaly vırýstyq aýrýlarmen aýrýy sebep bolýy múmkin. Aıaǵy aýyr áıelderge kóp preparattardy qabyldaýǵa qatań tyıym salynatyny da sodan.

«Qoıanjyryq» – joǵarǵy erinniń bitelýin bildiretin jaq-bet aımaǵynyń damý kemistigi. Erinniń ydyraýy júktiliktiń 8-shi aptasyna deıin, jaq-bet organdary damyǵan kezde paıda bolady. Bet sańylaýlaryn túzetýmen, buzylǵan fýnktsııalardy qalpyna keltirýmen jáne týa bitken patologııasy bar patsıentterdi ońaltýmen jaq-bet hırýrgııasy, stomatologııa, logopedııa, pedıatrııa salasyndaǵy mamandar aınalysady. Qoıan erni damýynyń taǵy bir faktory – kesh (35-40 jastan keıin) bosaný. Júktiliktiń sońǵy kezeńderinde uryqty ýltradybystyq zertteý derekteri boıynsha qoıan erni bar balanyń týýyn anyqtaýǵa bolady. Málimetke súıensek, Túrkistan oblystyq balalar aýrýhanasynda jyl basynan beri dál osyndaı kemistiktermen 143 balaǵa ota jasalǵan.

Túrkistan oblysynyń qoǵamdyq densaýlyq saqtaý basqarmasymen yntymaqtastyǵyn dáleldep, Aqnurǵa qaıyrymdylyq kórsetken Sýnchonhıan klınıkasy - mártebesi joǵary iri medıtsınalyq mekemelerdiń biri. Ortalyq 1978 jyly ashylǵan. Koreıa memleketiniń 4 iri qalasynda ortalyqtary bar. Pýchon qalasyndaǵy osy kópsalaly klınıkasy 3000 orynǵa eseptelgen. Syıymdylyǵy keń aýrýhanaǵa basqa memleketterden de em izdep kelýshiler kóp. Naýqastar aldyn ala jazylyp, beınejazba arqyly dárigerlik keńes ala alady.

Medıtsınalyq ortalyqtyń ujymy ózderi kútip alyp, em qabyldap ketkenge deıingi barlyq qajettilikterge jaǵdaı jasap qoıǵan. Túrkistan oblystyq qoǵamdyq densaýlyq basqarmasy men atalǵan klınıka arasyndaǵy eki jaqty kelisim munymen shektelmeıdi. Aldaǵy ýaqytta oblysymyzdyń dárigerleri Sýnchonhıan medıtsınalyq ortalyǵynda biliktilik arttyryp, tájirıbe almasady.

Sheteldik dárigerler taıaýda ǵana Túrkistan qalalyq aýrýhanasynda naýqastardy qabyldap, keńes bergen bolatyn. Professor, ári Sýnchonhıan klınıkasynyń basshysy Kım Hen Chol Túrkistan oblysynyń aýrýhanalary medıtsınalyq qural-jabdyqtarmen jaqsy qamtylyp, barlyq jaǵdaı jasalǵandyǵyn atap ótti. Bilikti dárigerlerińiz de jetkilikti dep otyr.

Basty maqsat - alda birlese tájirıbe almasyp, medıtsına salasyn jetildirý.