Túrkistandyq murajaıǵa 1878 jyly jaryq kórgen gazet pen kitaptardy tapsyrdy

TÚRKІSTAN. QazAqparat - Aqsaqal Turmaǵanbet Lahabaev «Áziret Sultan» memlekettik tarıhı-mádenı qoryq-mýzeıine tarıhı, dinı-rýhanı kitaptar men jazba eskertkishter tabys etti, dep habarlaıdy QazAqparat tilshisi.

Kúni búginge deıin kóne sandyqta oraýly jatqan muralardy kózdiń qarashyǵyndaı saqtap kelgen qarııa ǵasyr kórgen jádigerler ári qaraı murajaıda saqtalǵanyn jón sanapty.
«Ákem 3 jasymda qaıtys bolǵan. Jetpisten asyp kóz jumǵan anam osy dúnıelerdi amanattap ketti. Urpaqtan-urpaqqa jetken dúnıeni kútip-saqtaǵanymyz bolmasa, ishindegi jazýlardyń máni, tarıhı qundylyǵyna mán bermeppiz. Ǵasyrlar kórgen muralardy máńgilikke saqtaý úshin mýzeıge tapsyrýdy uıǵardyq»,- deıdi Turmaǵanbet qarııa.

Osy oraıda «Áziret Sultan» qoryq-mýzeıi dırektorynyń mindetin atqarýshy Ersin Tájibaev 81 jastaǵy Turmaǵanbet Adambekulynyń tarıhı qundylyqtarǵa jaýapkershilikpen qarap, mýzeıge tapsyrýǵa nıet etken bastamasyna alǵys aıtyp, mýzeı qyzmetkerleri kitaptardy ári qaraı kásibı turǵyda saqtaıtynyna ýáde etti.
Qoryq-mýzeıdiń qyzmetkeri Tolqyn Joldasov mýzeı qoryna amanattaǵan eńbekterdi aýdaryp, zertteý jumystaryn júrgizdi.
«1878 jyly Sankt Peterbýrgte basylyp shyqqan gazet qatty zaqymdalyp, usaq bólikterge bólinip ketken. Bólikterde dinı nysannyń (meshit nemese kesene) jekelegen bólikteri men arab tilindegi sózderdiń bólikteri baıqalady. Bul jádigerdiń mazmunyn anyqtaý úshin, tolyqtaı qaıta qalpyna keltirý jumystaryn júrgizý qajet»,- deıdi Tolqyn Joldasov.
Aýdarmashy mamandardyń aıtýynsha, taǵy bir kitapta paıǵambarlardyń oqıǵalary, ártúrli dertpen aýyrǵan adamdarǵa shıpa bolatyn duǵalar berilgen.