Túrkistandyq qymbat gúlder ósirip, ony jerlesterine tegin taratyp beredi
TÚRKІSTAN. QazAqparat - Túrkistan oblysynyń turǵyny qymbat gúlder ósirip, jerlesterine tegin taratyp berýde, dep habarlaıdy QazAqparat tilshisi.
Sozaq aýdany, Sozaq aýylynyń turǵyny Karamat Smaılovanyń aýlasynda gúldiń san túri jaıqalyp ósip tur. Olardyń ishinde astra, hrızantema, roza, raıhan sekildi 10 –nan asa astam sorty bar. Túri men túsin, boıy men babyn kelistirip otyrǵyzǵandyqtan turǵynnyń úıirgelik jeri búginde máýeli gúl baqqa aınalǵan.
«Men kóptegen jyldar boıy kóp qabatty turǵyn úıde turdym. Osydan 5 jyl buryn Sozaq aýylyna kóship keldik. Úlken úı aldyq. Sodan bala kezimnen hobbıime aınalǵan gúl ósirý isin qolǵa aldym. Alǵashqyda keı gúlderdiń dánin Tashkentten alyp keldim» - deıdi ol.
Búginde Karamat Shákirqyzynyń aýlasyndaǵy jaıqalyp turǵan gúlderdi kórý úshin qyzyqtap keletinder kóp. Tipti, sýretke túsip, jelige júkteý úshinde aýyl jastary jıi esik uratyn kórinedi. Sondaı-aq, týǵan kún men toı-jıynǵa surap kelýshilerde bar.
«Gúlderdi satpaımyn. Ózim gúlderdi jaqsy kóremin. Al, jerlesterime tegin taratyp beremin. Ótken jyly birazyn mektepke berdim» - deıdi ol.
Karamatqa kóbinese joldasy kómektesedi. Jyl saıyn jerdi tegistep, qajetti zattaryn jetkizip beredi. Al, gúl shyqqannan baptaý jumysyn júrgizý Karamattyń isi. Tań atqannan kún batqanǵa deıin qolyndaǵy kishkene qural-saımandarymen, aryq ishindegi shópti shaýyp, túbin bosatyp júredi. Ýaqytyly sýaryp otyrady.
«Bul meniń súıikti isim. Aldaǵy ýaqytta taǵyda kópshilikke tańsyq gúlderdi ósirýdi josparlap otyrmyn. Aýlada jaıqalyp ósken gúlder erekshe demalys syılaıdy»-deıdi Karamat Shákirqyzy.
