Túrkistandyq qurylysshylarǵa eńbek zańnamasynyń talaptary túsindirildi
TÚRKІSTAN. QazAqparat – Túrkistan qalasynda qurylys jumystaryn júrgizip jatqan kompanııalarda Qazaqstan Respýblıkasynyń eńbek zańnamasynyń talaptary boıynsha túsindirme jumystary júrgizildi, dep habarlaıdy QazAqparat tilshisi.
Kezdesý barysynda oblystyq eńbek ınspektsııasynyń basshylyǵy jumysshylar tarapynan qoıylǵan suraqtarǵa tolyqqandy jaýap berdi.
Kezdesýge jańa ákimshilik-iskerlik ortalyǵynda basqarmalar men departamentter ǵımaratyn jáne ortalyq stadıondy salyp jatqan «BI Construction Turkestan» JShS, oqýshylar saraıynyń qurylysyn júrgizip jatqan «Qulager» JShS jáne basseıni bar sport saraıyn salyp jatqan «Bazis Construction» JShS basshylary men jumysshylary qatysty.
Eńbek ınspektsııasynyń basshylary qurylysshylarǵa eńbek shartyn jasasý men ózgertý jáne tolyqtyrý tártibin, jumys ýaqytynyń qalypty uzaqtyǵy men aýysymdyq jumys, túngi ýaqyttaǵy jáne ústeme jumys pen jalaqy tóleýdiń merzimderi, laýazymdardy qosa atqarǵany úshin qosymsha aqy tóleý týraly máselelerdi aıtty.
Sondaı-aq, jumys berýshiniń eńbek qaýipsizdigi jáne eńbekti qorǵaý salasyndaǵy quqyqtary men mindetteri (nusqaýlyqtan ótkizý, arnaıy qujattarmen qamtamasyz etý, eńbekti qorǵaý boıynsha oqytý jáne bilimin tekserýden ótkizý, arnaıy kıimder berý, jumyskerlerdi jazataıym oqıǵadan saqtandyrý, profılaktıkalyq sharalar júrgizý) naqty mysaldar keltire otyryp túsindirildi.
Qurylys mekemeleriniń jumysshylarymen eńbek zańnamasynyń talaptary boıynsha túsindirý jumysyn júrgizý basqarma tarapynan jalǵasyn tappaq.
