Túrkistandyq kedenshiler rásimdelmegen 6 tonna taýardy tárkiledi

TÚRKІSTAN. QazAqparat – Túrkistan oblysy, Saryaǵash aýdanyndaǵy «Qaplanbek» keden beketinde rásimdelmegen 6 tonna taýar tárkilendi. Qazaqstandyq azamattar Ózbekstan Respýblıkasynan jetkizilgen taýardy zańsyz alyp ótpek bolǵan, dep habarlaıdy QazAqparat tilshisi.

Túrkistan oblysy boıynsha Memlekettik kirister departamentiniń málimetinshe, shekaradan ótken azamattar memlekettik shekaradan ótken kezde júk kólikterin bos dep kórsetken. Alaıda kedendik tekserý kezinde vedomstvo qyzmetkerleri avtokólikterden azyq-túlik pen ártúrli zattardy tapqan. Onda 137 qorapqa qaptalǵan 2710 keli qurt, 10 qapqa salynǵan 300 keli kók shaı jáne 16 qap balalar men áıelder jáne erler kıimderi bolǵan. Ári bul taýarlardyń barlyǵy rásimdeýden ótpegen. Sondaı-aq, keıin taǵy bir T.S. esimdi QR azamatynyń Ózbekstannan salmaǵy 2055 kelini quraıtyn 137 qorap qurt pen 250 keli kók shaı tárizdi rásimdelmegen taýarlardy alyp ótpek bolǵan áreketi sátsiz aıaqtaldy. Sonymen qatar, mamyr aıynyń ortasynda Qazaqstan azamattary kórshi respýblıkadan 608 keli káýap taıaqshalaryn zańsyz alyp shyqpaq bolǵan. Olardy soıa aqýyzy túrinde alyp ótken. Bul taýar kedendik rásimdeýden ótpegen, sondyqtan shekaradan ótý kezinde tárkilengen. Sonymen qatar, taǵy bir derek boıynsha bos dep kórsetilgen júk kólikteriniń birinen 62,7 keli kıim tabylǵan. Bul júk te shekaradan zańsyz ótý kezinde ustaldy. Shekara arqyly taýarlardy zańsyz alyp ótý derekteri boıynsha kináli tulǵalar ákimshilik jaýapkershilikke tartylǵan.