Túrkistandyq kásiporyndar bıyl 344 mlrd teńgeniń ónimin óndirgen

TÚRKІSTAN. QazAqparat - Túrkistan oblysynda aǵymdaǵy jyldyń 8 aıynyń qorytyndysymen ónerkásip kásiporyndary 344 mlrd teńge somasynda ónim óndirgen, dep habarlaıdy QazAqparat.

2018 jylmen (oblys qurylǵan sátten bastap) salystyrǵanda óndiris kólemi eki jylda 6,5%-ǵa ósken. Bul týraly Óńirlik kommýnıkatsııalar qyzmetinde ótken brıfıngte Túrkistan oblysynyń ınvestıtsııa jáne eksport basqarmasy basshysy Isa Qudabekov aıtty.

Onyń aıtýynsha, oblystaǵy 300 birlik ónerkásip oryndarynda 23 myńǵa jýyq adam jumys isteıdi.

«Búgingi tańda 2020-2023 jyldarǵa arnalǵan kásipkerlikti qoldaý kartasy aıasynda jalpy somasy 324 mlrd. teńgeni quraıtyn 29 joba iske asyrylýda. Nátıjesinde shamamen 6 myń jumys orny qurylatyn bolady. Al bıyl 12,5 mlrd.teńge somasyna 13 jobany iske asyrý josparlanýda. Tolyq iske asqan jaǵdaıda 1500 adam jumyspen qamtylady. Aǵymdaǵy jylǵy jobalardyń ishinde 3-i iske qosylǵan», - dedi Isa Musauly.