Túrkistandyq kásipker koronavırýsqa qarsy kúreske 25 mln teńge aýdardy
«Túrkistan oblysynda «Nur Otan» partııasy qolǵa alǵan «Biz birgemiz!» aktsııasy jalǵasýda. Kornavırýsqa qarsy kúresti kúsheıtý, kómekke asa muqtaj turǵyndardyń ál-aýqatyn kóterý maqsatyndaǵy aktsııaǵa óńirdegi kásipkerler, máslıhat depýtattary men metsenattar atsalysyp jatyr. Azamattyq pen jomarttyq synǵa túsken kezeńde belgili kásipker, metsenat Ráshkúl Ospanálıeva «Túrkistan» áleýmettik-korporatıvtik damý qoryna 25 mln teńge aýdaryp, aıryqsha janashyrlyq tanytty», - delingen óńirlik «Nur Otan» partııasynyń aqparatynda.
«Bereke-A» korporatsııasynyń basshysy Ráshkúl Ospanálıeva buǵan deıin de qaıyrymdy isterimen tanylǵan.
«Memleket tarapynan indetti taratpaý, eldiń densaýlyǵy men qaýipsizdigin saqtaý maqsatynda keshendi jumystar atqarylyp jatyr. Bul qıyn sátte eldiń árbir azamaty qoǵamǵa qoldan kelgen kómegin kórsetýi tıis dep esepteımin. Qaýipsizdik erejelerin saqtap, sabyr saqtaı bilsek, bul qıyndyqtan da shyǵamyz», – deıdi kásipker.
«Biz birgemiz!» aktsııasy boıynsha Túrkistan oblysynyń aýdan, qalalarynda 2 myńnan astam otbasyǵa azyq-túlik, gıgıenalyq jáne medıtsınalyq zattar taratylyp jatyr. Bul mindetti oryndaýǵa «Nur Otan» partııasy fılıaldarynyń ókilderi, «jasotandyqtar» jáne eriktiler tartylǵan.
