Túrkistandyq kásipker qaýipti indetpen kúreske 5 mln teńge aýdardy
TÚRKІSTAN. QazAqparat – Túrkistan oblysynda «Biz birgemiz!» aktsııasy jalǵasýda.
Koronavırýsqa qarsy kúresti kúsheıtý men kómekke muqtaj jandardy qoldaý maqsatynda belgili kásipker, oblystyq máslıhat depýtaty, «Bórte mılka» JShS dırektory Nuraly Ábish arnaıy qorǵa 5 mıllıon teńge aýdardy, dep habarlaıdy QazAqparat tilshisi.
Sonymen birge Nuraly Ábish ózi basqaratyn seriktestik atynan 100 otbasyǵa sútten jasalǵan ónimdermen demeýshilik kórsetti. Buǵan deıin de ıgi isterimen tanylyp júrgen «Nur Otan» partııasynyń múshesi jurtshylyqty qaýipti indetpen birigip kúresýge shaqyrdy.
«Biz úkimet tarapynan qolǵa alynyp otyrǵan shekteýler men saqtaný sharalaryna barynsha qoldaý bildirip, túsinistik tanytyp, barlyq talaptardy oryndaýǵa tıispiz. Sondaı-aq jalǵan aqparattarǵa senbeı, el ishinde úreı týǵyzbaýǵa, jurtty sabyrǵa shaqyryp, yntymaq, birlikke uıystyra bilýimiz kerek. Álemge qaýip tóndirip turǵan indetpen kúres júrgizý – tek medıtsına qyzmetkerleri men quqyq qorǵaý mamandarynyń ǵana emes, búkil qazaq qoǵamynyń mindeti», – dedi kásipker.
