Túrkistandyq kásipker aýrýhanaǵa eki tynys alý apparatyn syıǵa tartty

TÚRKІSTAN. QazAqparat –Maqtaaral aýdanynda jergilikti kásipker aýdandyq Myrzakent jáne Atakent aýrýhanalaryna quny 1 mıllıon teńge turatyn 2 jasandy tynys alý apparatyn syıǵa tartty, dep habarlaıdy QazAqparat tilshisi.

Ottegi kontsetratory men maskasy, muryn kanýlasynan turatyn medıtsınalyq apparattar koronavırýs indetine shaldyqqan naýqas balalardy emdeýde taptyrmaıtyn quraldardyń biri sanalady. Bul apparat jedel medıtsınalyq qyzmet kórsetýge arnalǵan.

«Koronavırýs ınfektsııasy asqynǵan jaǵdaıda adamnyń ókpesindegi tynys alý joldaryn zaqymdaıdy. Naýqasqa ottegi jetispeı qınalady. Mine, osyndaı jaǵdaıda tynys alý apparatynyń mańyzy zor. Dúnıejúzilik densaýlyq saqtaý uıymynyń málimetinshe, jasandy tynys alý apparattarynyń jetispeýshiliginen kóptegen elderde koronavırýs indetinen qaıtys bolýshylardyń sany artýda», - deıdi Myrzakent aýrýhanasynyń bas dárigeri Berik Naǵashbekuly.