Túrkistandyq fermerler sýǵa 2,5 ese artyq qun tólep otyr – senator
Depýtat Túrkistan oblysyndaǵy sharýalardyń máselesine toqtala kele, Otyrar men Saýran óńiri turǵyndarynyń 60 paıyzdan astamy egin sharýashylyǵymen aınalysatynyn basa aıtty. Sýarmaly sý baǵasynyń 2,5 esege kúrt ósýi sharýalardyń jumysynda aıtarlyqtaı qıyndyqtar týǵyzyp otyr. Endi olar tekshe metri úshin 700 teńgeden joǵary tóleýge májbúr bolsa, oblystyń kórshi aýdandary sýdy arzanyraq, tekshe metrin 285 teńgeden alyp jatyr.
«Óńirdegi kórshi aýdandar men aýyldar Túrkistan magıstraldyq arnasynan sý alady. Túrkistan magıstraldyq arnasy QR Úkimetiniń 2019 jylǵy qaýlysyna sáıkes, Túrkistan oblysynyń kommýnaldyq menshigine berilip, «Turan-sý» ShJQ MKK-niń teńgerimine ótken. «Turan-sý» mekemesiniń sý jetkizý qyzmet aqysy 1000 tekshe metr úshin 284 teńgeni qurady. Al Eski Iqan jáne Shilik aýyl okrýgterindegi arnalar Túrkistan magıstraldyq arnasynan bastaý alǵanymen «QazSýShar» RMK teńgeriminde. Bul aýyldardaǵy sý baǵasy 1000 tekshe metrge 701,12 teńge shamasynda. Turǵyndarynyń 60% astamy dıqanshylyqpen aınalysyp, kún kórisin eginshilikpen eńserip otyrǵan aýyl turǵyndary úshin sharyqtap turǵan sý baǵasy kásipti júrgizýge qıyndyq týǵyzyp otyr. Kóptegen sharýalar egin sharýashylyǵymen aınalysýdyń tıimsizdigin alǵa tartyp, egin egý naýqany bastalyp ketse de, jerlerin ıgermeı jatyr», - dedi senator Úkimet basshysynyń birinshi orynbasary Roman Sklıardyń atyna joldaǵan saýalynda.
Osyǵan baılanysty depýtat Mınıstrler kabınetinen joǵaryda atalǵan aýdandardyń sharýa qojalyqtary úshin tarıfti tómendetý máselelerin qarastyrýdy, sondaı-aq «QazSýSharǵa» tıesili ishki arnalardy «Turan-sý» kommýnaldyq kásipornynyń balansyna berýdi surady.
