Túrkistandyq erli-zaıypty mal urlyǵymen aınalysqan
TÚRKІSTAN. QazAqparat – Túrkistan oblysynda mal urlyǵymen turaqty túrde aınalysyp kelgen erli-zaıyptylar ustaldy, dep habarlaıdy QazAqparat.
Oblystyq Polıtsııa departamentiniń málimetinshe, erli-zaıyptylar eki aı boıy óńirdiń 5 aýdanynda jaıylymdaǵy maldardy urlap kelgen.
«Ordabasy aýdandyq polıtsııa bólimshesine jergilikti turǵyn arazdanyp, tamyz aıynda belgisiz tulǵalar jaıylymdyq jerden 1 bas buzaýyn urlap ketkenin aıtty. Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 188-baby («Urlyq») boıynsha tirkeldi. Dál osyndaı aryzben polıtseılerge taǵy birneshe jábirlenýshi shaǵymdandy», - dedi polıtsııadan.
Mal urylaryn ustaý jáne qylmysty ashý maqsatynda oblystyq PD-nyń tájirıbeli polıtseılerinen jedel-tergeý toby quryldy.
«Tártip saqshylary jaqyn aımaqtardy qarap, kýágerlerden surastyryp, mal satý oryndary men mal tasymaldaýshy avtokólikterdi tekserip, basqa da qajetti is-sharalardy júrgizdi. Nátıjesinde, jedel ýákilder er adam men áıeldi kúdikti retinde ustady. Olar Shymkent qalasynyń turǵyndary jáne erli-zaıypty bolyp shyqty», - delingen aqparatta.
Anyqtalǵandaı, olar Ordabasy, Qazyǵurt, Saıram, Túlkibas jáne Báıdibek aýdandaryndaǵy jaıylymdarda adamdardyń bolmaýyn paıdalanyp, maldardy urlap otyrǵan. Olardyń 10-nan astam qylmysqa qatysy bar bolyp shyqty.
Sondaı-aq urlanǵan maldardy satyp alýshy Shymkent qalasynyń turǵyny ustaldy. Ol da zań aldynda jaýapqa tartylatyn bolady.
