Túrkistandyq erli-zaıypty brakonerlik úshin 6 jylǵa sottaldy
Ótken jyldyń jazynda jedel-izdestirý is-sharalarynyń nátıjesinde oblystyq Polıtsııa departamentiniń jedel ýákilderi Shardara sý qoımasynda birneshe jyl brakonerlikpen aınalysyp kelgen qylmystyq topty ustaǵan bolatyn. Kúdiktilerden 13 qaıyq pen balyq aýlaý quraldary, eki tonnaǵa jýyq jańa aýlanǵan jáne ystalǵan balyq tárkilendi. Memleketke keltirilgen materıaldyq shyǵyn 8 mıllıon teńgeden asty.
Bul jaıtty polıtsııa qyzmetkerleri QR QK-niń 335-baby («Balyq resýrstaryn, basqa da sý janýarlaryn nemese ósimdikterin zańsyz alý») jáne QR QK-niń 380-baby («Bılik ókiline qatysty kúsh qoldaný») boıynsha sotqa deıingi tergep-tekserý tizilimine tirkedi.
«Úsh kúdikti er adamdy birden sot qamaýǵa aldy, al qalǵan 7-eýi «eshqaıda ketpeý» týraly qolhatpen bosatyldy», - dedi asa mańyzdy ister jónindegi aǵa tergeýshi Altynaı Jolymbekova.
Tergeýshige syraptamalardyń tolyq keshenin ótkizýge 3 aıdan astam ýaqyt qajet bolǵan. Nátıjesinde 10 adamnyń ústinen qozǵalǵan qylmystyq is 23 tomdy, onyń ishinde 4 myń paraqty qurady.
Aıyptaý isi 2020 jyldyń qarasha aıynda sotqa jiberildi. Sot 7 aıdan keıin óz sheshimin shyǵardy. Oǵan sáıkes, Jetisaı aýdanynyń turǵyndary 44 jáne 42 jastaǵy erli-zaıypty men 51 jastaǵy áıel – 6 jylǵa, 32 jastaǵy er adam 7 jylǵa sottaldy.
«Áıelderge qatysty bostandyǵynan aıyrý úkimi olardyń kámeletke tolmaǵan balalary 14 jasqa kelgennen keıin kúshine enedi.
Al brakonerlerdiń qylmystyq tobynyń qalǵan músheleri QR QK-niń 65-babyna sáıkes keltirilgen zalaldy óteý jáne kináni moıyndaýy, shyn ókinýine baılanysty qylmystyq jaýapkershilikten bosatyldy», - dep atap ótti asa mańyzdy ister jónindegi aǵa tergeýshi, polıtsııa maıory Altynaı Jolymbekova.