Túrkistandyq eriktiler pandemııaǵa qarsy muqtaj jandarǵa kómek kórsetýde
NUR-SULTAN. QazAqparat - Túrkistan oblystyq Jastar resýrstyq ortalyǵynyń erikti jastardan quralǵan arnaıy eriktiler toby koronavırýs pandemııasynyń aldyn alý sharalaryn uıymdastyrdy, dep habarlaıdy QazAqparat.
Jastar qala turǵyndary men kóshe boıyndaǵy qoǵamdyq jumysta júrgen qyzmetkerlerge, qurylys alańdary men aıaldamalarda turǵan kópshilik qaýymǵa 2000-ǵa jýyq medıtsınalyq qorǵanys betperdeleri men 10 lıtrge jýyq antıseptıkalyq suıyqtyqtar taratty. Oblys jastary men eriktiler, aýdan, qalalardaǵy kómekke muqtaj toptarǵa kómek kórsetý jumystaryn jalǵastyrýda.
Osy oraıda Jastar resýrstyq ortalyǵynyń qyzmetkerleri men erikti jastar birlese otyryp Kentaý, Arys qalalaryndaǵy otbasy úlgisindegi balalar úıi men mektep-ınternatyna bardy.
Onda koronovırýstyń aldyn alý sharalary boıynsha túsindirme jumystaryn júrgizip, balalar úıine medıtsınalyq zalalsyzdandyrý suıyqtyqtary jáne tazartqysh quraldaryn, sondaı-aq qorǵanys betperdeleri men dári-dárýmender sııaqty qazirgi jaǵdaıda asa qajetti zattardy taratty. Sondaı-aq kómekke muqtaj jandarǵa kómek kórsetý jumystary boıynsha Tólebı, Saıram aýdany men Shymkent qalasynda ornalasqan oblystyq otbasy úlgisindegi balalar úıi men qarttar úıin, mektep–ınternattaryna da osyndaı qoldaýlar kórsetti.
Aıta keteıik, oblys jastary men eriktiler tarapynan qamqorlyq tanytý baǵytyndaǵy bul ıgi is-sharalar aldaǵy ýaqytta da oblystyń barlyq aýmaǵynda turaqty túrde jalǵasatyn bolady.
